Sebarang pekara ti bekaul enggau hak rayat patut dilempaika ba piak ti bekaul ngambi sida mutarka pekara nya nitihka pematut
MIRI: Peranak Sarawak diperansang ngambi beratika pengamai sekeda berita lalu anang mudah ngaga pemutus nengah penemu diri sentang isu ti ngaul hak peranak Sarawak, pia ku Kaban Parlimen (MP) Sibuti Datuk Ahmad Lai Bujang.
“Tentuka pengamai pekara nya sebedau ngaga peragam ti enda betul, kelebih agi ba media rama laban tu deka ngenusahka diri empu, lalu kitai meseti seruran betatika sebarang pekara dipinta peranak Sarawak, dilempaika kitai ngagai Kepala Menteri laban iya ulih berandau terus enggau Menteri Besai kitai.
“Peranak Sarawak endang enda kala ditinggal, lalu kaul entara Kepala Menteri Patinggi Abang Johari Tun Openg enggau Menteri Besai Datuk Seri Najib Tun Razak chukup rat sereta seduai suah berandauka isu bekaul enggau rayat,” ku Ahmad Lai rambau Pengerami Makai Lemai Ngenang Jasa Kaunsil Pelilih Subis (SDC) ditu kena Hari Tiga, seraya staf SDC mega nerima anugerah penyulut servis ungkup taun 2016 sida.
Ku Ahmad Lai nambah, ketuai tetinggi seruran ngiga jalai pemadu manah dikena ngemansangka bansa lalu kelimpah ari nya iya mega meri puji ngagai SDC ba pemujur sida semanjai taun tu.
“Kaunsil pelilih nyadi pemun pemansang di tetiap pasar mit enggau mayuh penanggul ke diputar SDC, nyata ngayanka tanggungpengawa SDC ngemansangka peranak menua tu sereta kerejasama rat entara kaunsil kandang menua enggau rayat chukup manah.
“Subis mungkur kandang menua ke besai lalu pangku pengawa nyaup ngemansangka tetiap peranak Subis mega besai agi, nya alai jaku puji ngagai SDC sereta meri terima kasih ngagai semua kita ti udah mantu ngelama tu,” ku iya seraya nambah, pengerami makai lemai ngenang jasa siti ari pelasar dikena neritka tanggam kaul antara bemacham opis seraya ngenang pemanah pengawa digagag SDC.
Nitih ku Chairperson Pengatur Program Nur Farisha Ibrahim, SDC menang Anugerah Kepala Menteri Sarawak ba Kategori Raban Bekuasa Bekaul Kandang Menua kena 13 Disember tu tadi.
“Kelimpah ari ari Anugerah Kepala Menteri, kena 21 November, SDC mega menang Smart-i Community Award ke alai SDC dichalunka dua komuniti, iya nya Komiti Pemansang enggau Pengelikun Genturung Pendiau (JKKK) Kampung Selanyau sereta JKKK Rumah Panjang Patrick Libau.
“JKKK Kampung Selanyau menang Diamond Award enggau mata duit RM10,000 ungkup projek madu engkelulut sida seraya JKKK Rumah Panjang Patrick Libau menang Gold Award enggau mata duit RM7,000 ungkup projek homestay sida,” ku iya nerang.
Sama bisi datai Pemesai Pelilih Subis Husini Bakir, Sekretari SDC Lolita Jaime Nicholas sereta bala ketuai raban bansa ke bukai.
Tentuka pengamai pekara nya sebedau ngaga peragam ti enda betul, kelebih agi ba media rama laban tu deka ngenusahka diri empu, lalu kitai meseti seruran betatika sebarang pekara dipinta peranak Sarawak, dilempaika kitai ngagai Kepala Menteri laban iya ulih berandau terus enggau Menteri Besai kitai. Datuk Ahmad Lai Bujang MP Sibuti