Perintah udah nyediaka pelasar ungkup rayat ngangkatka tikas ekonomi
KUCHING: Platform tauka pelasar ti bisi disediaka perintah kelebih agi dalam industri pemakai enggau betanam betupi moden dikearapka muka peluang ngagai raban bansa lebih agi bansa Dayak ngangkatka tikas ekonomi enggau pengidup.
Pengepun Raban Pemikir Dayak (DTTG), Wellie Henry Majang ngarapka raban bansa Dayak udah besedia sereta ngemeratka industri pemakai enggau betanam betupi moden ngena chara pintar ba taun baru, senipak enggau segang pemansang.
“Semanjai taun 2017, kitai udah sedar sereta majak mayuh raban bansa kitai Dayak ti ngambi bagi dalam industri pemakai enggau betanam betupi moden lalu ngarapka aktiviti ekonomi ti mayuh bengkah ulih nyungkakka tikas ekonomi bansa kitai.
“Kami ngarapka raban bansa kitai Dayak besedia bejalaika aktiviti ekonomi ti mayuh bengkah, ti dipejalaika bererenggat ke deka ngansak pemesai Dayak numbuhka siti pelasar ke lebih meruan ungkup raban bansa kitai lebih chakag sereta regas dalam industri pemakai enggau ai irup sereta ngemeranka chara betanam betupi pintar,” ku iya madah ngagai Utusan Borneo.
Berebak enggau tu seraya ti meri penerang nyerumba taun baru 2018, Wellie ngarapka bansa kitai Dayak ngambi bagi tauka maruk diri dalam bidang ekonomi nengah industri pemakai enggau ai irup.
“Ngarapka bansa kitai ulih ngena tanah enggau manah baka betanamka mayuh macham utai tanam baka buah ke ulih meri penguntung ari ti ngelakka tanah nya enda dikemansang,” ku iya.
Polisi Ekonomi Digital ti ditumbuhka Kepala Menteri Datuk Patinggi abang Johari Tun Openg dikearap sereta dikeandalka ulih mantu nengeri nyadi pengeluar tauka penyual buah pemadu besai.
Nya setipak bendar enggau inisiatif perintah nengeri ti bejalaika aktiviti betanam betupi moden di Sarawak, lebih agi ngena teknologi pintar dikena ngangkatka produktiviti enggau kualiti kelimpah ari mantu ngerembaika market.