Taun 2018 dikearap meri pengandal ngagai bansa Dayak ba PM, PG

KUCHING: Dikearapka taun 2018 meri pengandal enggau pengarap baru ngagai raban bansa Dayak kelebih agi asil pemansik dalam bekaul enggau Pemakai Menua (PM) enggau Pulau Galau (PG).

Pengepun Raban Pemikir Dayak (DTTG) Wellie Henry Majang madahka, raban bansa Dayak endang ngarap sereta bepanggai bendar ngagai Sapit Kepala Menteri Datuk Amar Douglas Uggah Embas deka bulih asil ari pengawa pansik dalam bekaul PM enggau PG ke nyau deka manggai setaun.

“Aku ngarika DTTG melabaka raban bansa Dayak serata nengeri tu meri pengarap sereta pengandal besai ngagai ketuai lumur dua dalam perintah Sarawak sereta deka mendingka iya bejuraika pasal usul ubah Kanun Tanah Sarawak ti ngaku tauka meri kelala PM enggau PG maya baum kunsil nengeri (DUN) bulan Mei 2018 ila.

“Kitai arap bendar piak bekaul ngaku tanah adat nitihka pematut sereta disukung tegap pemesai tauka ketuai Dayak ulih nentuka penumbuh ekonomi ti nadai tatak sereta pemansang raban bansa Dayak dalam mayuh bengkah aktiviti ekonomi,” ku iya madah ngagai Utusan Borneo bekaul enggau pengandal sereta pengarap DTTG taun 2018.

Iya ngarapka bansa Dayak terus konsisten dalam hak PM enggau PG, taja pan RUU Persendirian Pindaan Kanun Tanah Sarawak ti dipejuraika ADUN Ba’Kelalan Baru Bian maya baum DUN November tu tadi, enda dikemendarka DUN.

Taja pia, kitai patut terus ngemajuka tanah ke ditampung ari orang tuai kelia nyengkaum tanah Hak Adat Bumiputera (NCR) enda ngira chara dikena nempa sereta nambahka penatai pemisi ti meruan ke ruang bilik lebih adi peranak di menua pesisir, ku Wellie.

Bepelasarka ripot BERNAMA dalam bulan November tu tadi nyerumba aum kunsil nengeri, Uggah madahka ubah Kanun Tanah bekaul enggau PM sereta PG dipelabaka tembu sereta dipejuraika ba Kunsil Nengeri ( DUN) Sarawak dalam bulan Mei 2018.

Beduduk ari pekara nya Uggah minta mensia mayuh ngambika liat ati nganti sereta meri awak ngagai pasukan petugas mansik isu nya enggau holistik awakka pekara bekaul tanah NCR ulih diputarka.

Uggah ti mega Menteri Betanam Betupi Moden, Tanah Adat enggau Pemansang Mengeri lebuh ke nyimpul jurai Bajet Negeri 2018 madahka perintah nengeri bisi penyedar ngagai empas pemutus Kort Besai ti madahka PM enggau PG nadai dituku di baruh kuasa undang-undang di nengeri Sarawak.

Pasukan petugas khas ditumbuhka ti bechaimanka Uggah sereta dianggotai menteri nengeri enggau perintah besai, kaban politik, pengereja pengawa opis perintah kanan enggau pengemeran undangundang, ti berunding sereta meri perambu chara mutarka isu hak tanah adat PM enggau PG enggau engkeman.