Jematan Bekenu ti beungkus RM24 juta deka tembu taun 2018

MIRI: Jematan Bekenu beungkus RM24 juta dipelaba tembu dalam pun taun tu lalu meri rampa baru ba perengka pengangkut peranak Bekenu.

Kaban Parlimen ( MP) Sibuti, Datuk Ahmad Lai Bujang madahka jematan nya udah tembu manggai 90 peratus lalu udah ditengah peranak dia pulai mansang ngagai pasar Bekenu.

“Semina kereja ngaluska belakin jalai enggau landskap ngemanahka agi rampa jematan nya lalu iya deka meri pemaik ngagai peranak Bekenu kelebih agi kampung Rambai,” ku iya, ditu kemari.

Pengawa ngaga jematan meraka Sungai Sibuti beungkus RM26 juta deka nyungkak aktiviti ekonomi Sibuti sereta mantu pemansang genturung pendiau enda jauh ari mengeri besai Miri.

Ku iya, jematan tu endang dianti peranak Sibuti laban nyadi jalai penyambung besai peranak di seberai sungai pasar Bekenu ngagai mengeri besai Miri.

Ungkus ngaga RM26 juta tu nyengkaum pengawa ngaga jematan sepemanjai 70 meter enggau pemesai 11.43 meter.

Pengawa ngelacharka projek ngaga jematan udah dipenyadika niang Kepala Menteri Datuk Patinggi Tan Sri Adenan Satem dalam taun 2015.

Ahmad Lai madah pengudah projek jematan tu tembu deka nyungkak ekonomi di Sibuti kelebih agi ngemuntangka pengawa raban orang bumai enggau berikan nyual produk sida.

“Ke diatu, sida udah nengah jematan tu ngelawa pasar Bekenu lalu tu ngemuntangka pejalai sida,” ku iya.

Ba lansa bekaul, Ahmad Lai mega ngelalau semua peranak ke diau di kandang tanah baruh di sitak Sibuti ngambika bejejaga enggau penusah bah.

Nitih ku iya, sekeda kandang menua baruh di Sungai Saeh udah ampuh bah ketegal ujan bangat enggau ai pasar raya.

Opis Bomba enggau Penyah Penusah sereta raban Opis Pelilih mega udah digerah sedia napi penusah bah nyema bisi dipinta mindah.