Taun 2016 bisi ngerikod 20 kes penusah angus di rumah panjai lalu rikod tu nambah ngagai 24 kes ba taun 2017
KUCHING: Kes penusah angus rumah panjai di Sarawak taun 2017 bisi ngayanka penambah enti dibandingka enggau taun 2016, pia ku Direktor Opis Bomba enggau Penyelamat Malaysia (Bomba) Nengeri Sarawak, Nor Hisham Mohamad.
“Penusah angus rumah panjai di nengeri tu taun 2017 bisi nambah iya nya ngerikutka 24 kes ti mungkur 355 pintu bilik sereta 1,939 iku peranak rumah panjai enti dibandingka enggau taun 2016 bisi 20 kes ti mungkur 417 pintu bilik sereta 2,482 iku peranak.
“Ari penyampau kes nya, penusah angus nya ngerikut- ka pengerugi sepenyampau RM19,995,350 (355 pintu) ba taun 2017 dibandingka enggau taun 2016 RM16,112,936.20 (417 pintu),” ku iya lebuh ditanya Utusan Borneo bekaul kes penusah angus rumah panjai di nengeri tu.
Berebak enggau tu iya madahka penyampau reta tengkira ke ulih diselamatka iya nya urung RM4,006,400 ba taun 2017 lalu RM9,158,926 taun nyin kemari.
Lebuh ditanya bekaul program dipejalaika ba rumah panjai dikena nyeliahka pe- nusah angus nyadi, Hisham madahka, semanjai timpuh 2012 ngagai 2017 iya program ke diatur enggau peranak rumah panjai ke lalu relatif deka meda pemanah empas program nya.
Taja pia enti bepelasarka penyedar ari peranak rumah panjai ku iya, jauh lebih manah tauka ngayanka positif kelimpah ari timbal positif bala Kaban Kunsil Nengeri (ADUN).
Saup sereta penyereta ari gerempung ukai dikuasa perintah ( NGO) enggau peribit ti melanja mega majak nambah, ku iya.
“Enti bekaul enggau penyampau pintu bilik ti kena penusah, taja pan penyampau kes nambah ari taun 2016 tang penyampau pintu bilik ke kena penusah nya bisi nurun.
“Kelimpah ari nya, bisi dua kes penusah angus ke nyadi dalam taun 2017 mujur dipadamka peranak rumah panjai nya empu iya nya sida ti nyereta program penyedar kami sereta lalu ulih nyelamatka rumah panjai nya. Kes nya kena 22 Januari 2017 (di Marudi) enggau 03 Julai 2017 (di Bintangor),” ku iya.
Bejaku baru Hisham madahka enti ari semua pekara agi mayuh ubah ke patut dikemanahka pia iya dikena nyeliahka kes penusah rumah panjai ke patut dipejalaika.
Ku iya, dikena nyeliahka kes rumah panjai angus di nengeri tu piak Bomba betapi enggau mayuh penguji sereta pemar.
“Penyedar peranak rumah panjai nyambung tali karan ngena piawaian betul, meli keberan pemadam api sukarela sereta ngaga baru rumah ti ngemeratka pengelikun terus nyadi penguji enggau pemar besai ti ditapi.
“Kami mega terus ngemeratka ngagai tiga aspek disiplin penusah angus 3L iya nya ‘Leka, Lalai, Lupa’,” ku Hisham.
Entara penusah angus rumah panjai ke nyadi di Sarawak sepemanjai taun 2017 iya nya Rumah Panjai Long Palai, di Ulu Baram; rumah panjai di Bekelit, Sibuti ke dipegai dua iku tuai rumah (Tr) iya nya Tr Jambai Jali enggau Tr Majang Ringkai; Rumah Ming, Nyelutung Betong enggau ke bukai.
Penusah angus rumah panjai di nengeri tu taun 2017 bisi nambah iya nya ngerikutka 24 kes ti mungkur 355 pintu bilik sereta 1,939 iku peranak rumah panjai enti dibandingka enggau taun 2016 bisi 20 kes ti mungkur 417 pintu bilik sereta 2,482 iku peranak. Nor Hisham Mohamad Direktor Opis Bomba enggau Penyelamat Malaysia (Bomba) Nengeri Sarawak