Main asal Orang Ulu deka diangkat ngagai renggat antarabansa
MIRI: Duta di Belanda rindu meda pemanah sereta penyelai main asal Orang Ulu kelebih agi bansa Kayan enggau Kenyah lalu deka terus ngelakuka nya ngagai renggat antarabansa.
Duta Besai Malaysia ke Belanda, Datuk Ahmad Nazri Yusof madah, ambika chunto main Sape enggau tanda Hivan Joh (dalam jaku kayan) nyadi pekara ke baru sereta nyelai.
“Aku berasai gaga meda kededua main asal ke dibantaika tu laban nya ukai pekara ti ulih suah dipeda kitai. Mayuh peranak Malaysia enggau rayat Belanda ditu gagit ati sereta rindu meda kededua main asal nya ke baru ba kami, muka mata sereta nyelai,” ku iya rambau bejadika pengawa mantaika main asal Orang Ulu ari deligit Baram Sape Master (BSM) di Bangunan Perbadanan Pembangunan Perdagangan Luar Malaysia (Matrade) di Rotterdam, Belanda apin lama ke udah.
Ahmad Nazri mega muji pemanah pengawa enggau pengeran bala komiti BSM ti diketuaika Ketuai Deligit Temenggong Elizabeth Deng mantai sereta mandangka penyelai main asal Orang Ulu di renggat antarabansa.
Ba lansa ke bukai, rambau atur randau pengudah pengawa nya, Ahmad Nazri ngarapka dudi hari ila, komiti ulih bekerejasama sereta ngaul diri terus enggau piak kedutaan ba pekara ngatur pengawa nya.
Ku iya, piak kedutaan di Belanda sedia bekerejasama enggau kedutaan besai Malaysia ari menua Eropah ke bukai ngemujurka program ke bansa nya.
“Kitai seruran nganti peluang ke bansa tu ke endang dilaluka sebarang raban ti deka mandangka pengawa ditu, berindik ari main asal siti ari bidang di baruh kedutaan,” ku Ahmad Nazri.
Iya meri terima kasih ngagai raban BSM laban udah milih ngatur pengawa di Kedutaan Besai Malaysia di Belanda lalu ngarapka iya ulih muka mata bala pesereta bekaul enggau main asal orang Belanda.
Ba lansa ke bukai, Temenggong Elizabeth madah deligit temegah ati laban ulih nyapai juluk deka ngatur pengawa di menua luar sereta mantaika main asal Orang Ulu ari Baram.
Ku iya, deligit iya nya tukang tebah sape enggau orang ti betanda ajat Orang Ulu ti pemadu nyulut.
“Kitai temegah ati endar laban ulih mantaika muzik Sape enggau tanda Hivan Joh ke asal di renggat antarabansa kelebih agi di Belanda. Kitai meri terima kasih ngagai kedutaan lalu ngarap ulih bekerejasama dudi hari.”
Ku Elizabeth, Orang Ulu tebilang enggau main asal tang agi mayuh orang enda nemu pekara bekenaka pekayan enggau muzik Sape ke asal.
“Kitai deka mantaika main asal Orang Ulu ke asal di antarabansa sebedau orang bukai ti enda nemu pasal Orang Ulu ngaga baka nya. kitai deka komuniti antarabansa nemua kelai bansa Orang Ulu ke bendar.”
“Ambika chunto, kami enggaika orang bukai ngangkatka pekayan asal Kayan Kenyah nyadi fesyen lalu ukai ke asal. Nya kebuah, pengawa tu beguna endar dikena ngajar komuniti di dalam enggau luar menua ba kelai kitai ke bendar,” ku iya.
Dulu agi ari nya, bala staf enggau sida sebilik Kedutaan Besai Malaysia ke Belanda, Matrade, Opis Menteri Dagang Temuai enggau Main Asal Malaysia, komuniti Malaysia ke diau besemak The Hague sereta komuniti di Belanda dibantaika enggau tanda Hivan Joh ari raban penari Tingang Madang diketuai Connie Layun disempulang tebah Sape.
Temuai ke bisi dikangau enggau bala bukai bela teperindang enggau tebah Sape ari dua BSM iya nya Robin Jalong Lusat enggau Matius Erang ari Long Mekaba, Baram.
Sama bisi merindang ngena Sape kediri aja iya nya Datin Mujan Jok, bini penyanding penemu komiti BSM ke lalu nyadi ex- Senator, Datuk Lihan Jok.
Sama bisi datai bini Ahmad Nazri, Datin Syarizan Adzlinda Mz Zin, ketuai penyelia BSM 2017 Jok Eng Jok, Penghulu Jalong Tanyit sereta bala kaban komiti BSM 2017 ke bukai.
Pengudah tembu, kesemua bala ke bisi datai bela betanda tanda panjai.
Kelimpah ari nya, penari Tingang Madang enggau pemain sape Alex Apoi mega bisi merindang di Church of our Saviour di The Hague.