100 iku pesereta ari RSS KuchingSamarahan nyereta pekit Pencha Silat
KUCHING: Urung 100 iku penyereta ari 12 palan pencha silat baruh pegai Rumpun Silat Sarawak (RSS) Pampang Kuching-Samarahan bisi enggau bepekit Pencha Silat ke digaga dalam kandang dua hari tu di sebuah palan bebeli barang di bandaraya tu.
Pekit nya mega diatur Perguruan Seni Silat (PSS) Dendam Perantau, Dewan Bandaraya Kuching Utara (DBKU), Sara Urus Harta Sdn Bhd enggau RSS.
Urung semilan kategori dipekitka ba program nya, iya nya kategori solo kreatif putera baruh umur 12 taun, kategori solo kreatif putera (13 ngagai 19 taun), kategori solo kreatif puteri baruh 12 taun, kategori solo kreatif puteri (13 ngagai 19 taun), kategori ganda putera baruh 12 taun, kategori ganda putera (13 ngagai 19 taun), kategori ganda puteri baruh 12 taun, kategori ganda puteri (13 ngagai 19 taun) enggau kategori wiraloka bebas @ jurus puteri.
Atur pengawa nya kemari dipejadika ulih Pegawai Khas ngagai Kaban Kunsil Nengeri (ADUN) Tupong, Fazzrudin Abdul Rahman ti mega nyadi Sapit Presiden Rumpun Silat Sarawak, Nuruddin Su’ut.
Ba jaku iya, Nuruddin nyerumba program nya palan ke manah endur ngiga bakat baru ba entara main pencha silat ke ulih ngarika Sarawak, jemah ila.
“Aku ngarapka program pekit tu ulih digaga mayuh agi jemah ila, ngambika bisi awak kitai ngelatih bala nembiak ke bepengelandik ke ulih bepekit ba renggat kebangsaan tauka entarabansa,” ku iya ke bisi meri jaku lalau ngagai semua palan endur ngajar pencha silat di menua tu, enda ngasuh sida iya bepechah tang beserakup enggau pangan diri.
Ba pekit nya kemari, PSS Nilam Sari dipadu nyadi champion dalam semua kategori Pekit Pecha Silat 2017, lalu ba penuduk kedua enggau ketiga dipenggi PSS Dendam Perantau enggau Cakar Harimau.
Semua pemenang nya kemari mai pulai wang, setipikit sereta trofi.