Di Sarawak bisi urung 128 buah sekula misyen ke ngembuan 45,000 iku nembiak ti balat udah jai sereta patut dikemanah

BETONG: Kepala Menteri Datuk Patinggi Dr Abang Johari Tun Openg kemari madahka diri naka ulih deka mantu sekula di Sarawak.

“Aku nadai penanggul pasal sekula misyen, semina kita madah ngagai aku berapa penyampau. Kami naka ulih nguji mantu sekula kitai,” ku iya madah nyemetak.

Bejaku ba pengawa bejadika Aum Besai Tiga Taun Sekali (TGM) Pesaka Bumiputera Bersatu (PBB) Zon 5 ditu kemari, ku Johari, iya berasai gagit lebuh berandauka pekara sekula.

“Kebuah pia laban mayuh sekula kitai udah kelalu balat jai. Ke bendar, nyauka 1,000 buah sekula di Sarawak ke jai. Aku udah madah ngagai Menteri Besai ke alai aku deka ngemanahka semua sekula tu ngena belanja kitai empu, tang perinah besai meseti mayar pulai,” ku iya.

Ku Johari, iya madah ngagai Menteri Besai, Datuk Seri Mohd Najib Tun Razak, ke alai iya deka ngagihka belanja sepenyampau RM1 bilion tang enda ulih nganti belanja ari perintah besai.

“Aku madah ngagai Menteri Besai kitai enda ulih nganti laban sekula udah kelalu jai, kuarters pengajar mega kelalu jai. Aku madah ngagai iya ngena belanja kitai dulu, Kitai nginjau ari bank. Udah nya, Menteri Besai setuju enda ibuh ngena duit ari bank. Perintah besai deka meri RM1 bilion nengah Bajet 2018,” ku Johari nerang.

Johari nimbal Sapit Kepala Menteri, Datuk Amar Douglas Uggah Embas ke dulu bejaku minta perintah Sarawak mantu ngemanahka sekula misyendi serata Sarawak.

Uggah madahka RM1 bilion dikemendarka perintah besai enda mungkur sekula misyen, kelebih agi ke di kandang menua pesisir.

“Mayuh sekula misyendi menua pesisir udah balat jai tang sida enda ulih minta bantu ari belanja RM1 bilion,” ku Uggah.

Ku iya, sekula misyenmenua pesisir bejalaika pengawa ke beguna endar dalam komu- niti sereta udah nempa mayuh orang ke besai sereta beguna dalam sejarah Sarawak.

“Betong ngadaka Kepala Menteri keterubah, ke ditempa sekula misyen. Lalu, Kepala Menteri kitai ke diatu mega ditempa ari sekula misyen. Pia mega aku empu enggau Datuk Patinggi Dr Alfred Jabu,” ku Uggah madah nyemetak.

Ku Uggah, Sarawak bisi urung 128 buah sekula misyenke ngembuan 45,000 iku nembiak, di Betong aja bisi enam buah primari enggau tujuh buah sekula sekondari .

“Enti kitai beratika gaya sekula tu, kelalu jai. Sema jaku kerungan manuk jauh manah ari sekula nya. Bisi bantu ari perintah besai, tang kitai begunaka mayuh agi. Kepala Menteri udah mujur ngulihka belanja RM1 bilion bantu ari perintah besai,” ku Uggah.

Iya ngarapka belanja nya deka dikena ngemanahka semua sekula menua ulu kelebih agi di Ulu Krian, Ulu Layar, Kabong, Simanggang enggau ke bukai, tang sinu amat, opis pelajar madahka sekula misyen enda patut dibantu ngena belanja nya.

Aku nadai penanggul pasal sekula misyen, semina kita madah ngagai aku berapa penyampau. Kami naka ulih nguji mantu sekula kitai. Datuk Patinggi Dr Abang Johari Tun Openg Kepala Menteri Sarawak