S.O.S Kuching enda setuju enggau atur nangkap lalu munuh ukui siga
KUCHING: Gerempung ‘ Save Our Strays Kuching’ (S.O.S Kuching) enda setuju enggau atur perintah nangkap lalu madamka seput ukui siga.
Presiden S.O.S Kuching, Kitty Chin madah perintah meseti berundingka chara bukai ti bela ulih ngelaban pengelekai sakit rabies.
Berindik enggau nya, gerempung ku Kitty sedia nyendiaka palan endur engkah ukui siga ke ditangkap.
“Ba sentang pekara tu, kitai ngarap perintah ngaga kerejasama enggau gerempung ke ukai dikuasa perintah (NGO) baka ke S.O.S Kuching.
“Kitai enda setuju enggau atur madamka seput ukui siga lalu sedia nyendia palan endur engkah ukui ke ditangkap,” ku iya ba aum pengarang berita di Kuching kemari.
Nitihka penerang Kitty, atur nuchuk ukui enggau vaksin rabies meseti dipajak lalu mungkur ukui siga ke ditangkap.
Ku iya nya sigi chara dikena ngelaban keruga sakit rabies ti udah ngelekai di nengeri tu kenyau 1 Julai 2017.
“Kitai ngarap autoriti majakka program nuchuk jelu enggau vaksin rabies lalu ukai semina ba jelu ke ditupi tang ba jelu siga bukai dalam kandang mengeri,” ku Kitty.
Iya pechaya atur madamka seput ukui nengah chara nuchuk jelu nya ngena dadah begunaka belanja ti besai agi enti dibandingka enggau program betuchuk vaksin rabies.
Bela ngulu aum pengarang berita kemari raban komiti S.O.S Kuching iya nya Sim Swee Sia enggau Kimberly Lim.