S.O.S Kuching sedia deka bekerejasama enggau polis
KUCHING: Gerempung ‘Save our Strays Kuching’ ( S. O. S Kuching) sedia meri kerejasama ngagai polis sentang penemu ti munyika ngachuk runding ngambika ngereja ulah jai ari sekeda orang ba Facebook gerempung nya.
Presiden S. O. S Kuching, Kitty Chin madahka penemu ti dibantai dalam Facebook sida sentang operasyen nangkap ukui siga udah nyadika palan endur mensia mayuh mantaika pengeringat.
“Nadai pematut nyalahka S.O.S Kuching sentang isu tu. Facebook kami udah nyadika palan endur mensia mayuh mantaika pengeringat.
“Raban orang ti sayauka jelu enda setuju enggau atur perintah ( opis Kunsil) nangkap lalu munuh ukui siga.
“Tajapia kitai sedia meri kerejasama ngagai polis enti dikangau,” ku iya ba aum pengarang berita di Kuching kemari.
Kena Hari Dua tu tadi, Sarawak udah ngelanchar perang ngelaban ukui gila ( rabies) lalu tanggungpengawa nya pejalai Opis Servis Veteriner Sarawak ( JPVS) enggau Opis Kunsil.
Ensanus, Opis Polis bisi nerima ripot ari JPVS ke alai sekeda orang bisi mansutka penemu munyika ngachuk runding ngambika ngereja ulah enda manah ti dikeirauka ulih ngemuntan atur nagang pengerembai virus rabies.
Ketuai Bagi Tasat Jpengawa Jai Sarawak Datuk Dev Kumar ngebukuka pekara nya lalu opis polis deka nasat sereta ngangau orang ke ngempu Facebook nya.
Sekeda penemu ti dibantai dalam akaun Facebook ke diempu S.O.S Kuching merambu raban orang ke nyereta operasyen nangkap ukui siga dibunuh.
Bisi mega merambu ngaga tekat ba jalai enggau tuju ngemuntan operasyen lalu ngelepas ukui ke ditangkap.
Kena Hari Tiga (3 Januari), operasyen keterubah nangkap ukui siga dipejalaika ba genturung pendiau Matang Jaya, Taman Jutaria enggau Taman Dahlia lalu ditangkanka di MJC Batu Kawa, RPR Batu Kawa enggau Jalai Arang kena 4 Januari.
Operasyen ke sama dipejalaika kena 5 Januari di Taman San Chin, Genesis, Rantau Panjang enggau Moyan.
Kemari ( 6 Januari) operasyen dipejalaika di BDC, Tabuan Tranquility enggau Taman Kenyalang lalu sehari tu di Pelilih Bau iya nya di Singai, Tondong enggau Serikin.