Pengawa bepantang udah ngerembai nyadi fesyen sereta dikomersial nyerunyut ubah dunya
KUCHING: Setipak enggau pemansang dunya, bepantang ukai semina mandangka daya idup bansa Iban tang diatu udah ngerembai nyadi fesyen sereta dikomersialka.
Dulu kelia, kereban ke dikena mantang digaga ari kayu dibandingka enggau dunya moden diatu ti ngena injin.
Siku anak Iban ti udah tebilang nama, jelai rita nyentuk ke renggat antarabansa dalam profesyen mantang, Ernesto Kalum, 47,bepenemu pengawa bepantang diatu kelebih ngagai peneka individu setipak enggau ubah sereta pemansang dunya.
Dulu kelia ku iya, bansa kitai Iban udah bepantang enti udah nemu bejalai ngantika diri ngiga pengidup, ti nadai agi dikemeranka dalam jeman moden.
“Semina 10 peratus aja bansa kitai ke agi nunda chara kelia iya nya bulih penyulut ba pelajar, sekula, udah graduet, bulih pengawa, bejalai ke menua orang sereta niki pangkat, ti ngaga pantang dikena ngelaika penyulut nya.
“Tebal agi rebak diatu nyengkaum bansa kitai ke bepantang laban nya udah ‘trend’ sereta nyadi fesyen. Lalu motif ke dipilih mega lebih ngagai motif moden,” ku iya lebuh dikerandau Utusan Borneo ba studio iya di Jalai Wayang ditu, kemari.
Ernesto ti asal ari Rumah Panjai Temedak, Spak, Betong bisi pengerindu ba pen- gawa bepantang enggau mantang dalam taun 1993, ketegal ti deka bisi pantang.
Iya ti bisi 25 taun peneleba mantang sereta udah bisi studio ke diri empu ke diberi nama ‘BorneoHead Hunters Tatto and Piercing’ ti ditumbuhka 20 taun ke udah, madahka diri temegah ati laban ulih mulaika pengingat daya idup Iban kelia.
Lebuh ke ngenang pasal chara ti dikemeranka iya mantang, Ernesto madah ngemeranka chara asal iya nya ngena kayu tebelian ke diraut diri empu sereta jarum kelimpah ari ngemeranka chara moden iya nya ngena injin.
Nitih ku iya ti nerima penatai orang ke minta pantang 50 peratus ari menua tu enggau 50 peratus ari menua tasik, tebal agi orang menua tasik milih chara asal dibandingka enggau peranak menua kitai.
“Ba pengawa aku ke mantang orang tu aku deka agi mantang orang ngena chara asal laban ba aku chara tu lebih bekualiti. Lalu enti ngena chara asal aku meransang sida iya ngena motif asal baka bungai terung enggau ke bukai.
“Tang setipak enggau dunya mansang, aku mega bisi nyendiaka servis moden iya nya ngena injin, dikena napi peminta orang ke deka bepantang ba aku,” ku iya ti dibantu Robinson Unau.
Kelimpah ari nya, lebuh ditanya chara iya ngerembaika kereja mantang tu, Ernesto madahka maya ke berengkah suba endang bisi penusah lebuh deka ngelakuka asil iya.
Dunya moden diatu ku iya, mayuh kereban teknologi tauka media rama ke ulih mantu ngerembaika asil pantang ngagai serata dunya.
“Dulu suba endang tusah. Diatu ulih ngelakuka nengah Instagram, Facebook, Website enggau media rama ke bukai ke lalu ulih dipeda semua orang.
“Enti enda salah ingat aku, aku mih orang ti keterubah ngelakuka pengawa tauka asil pantang nengah website, pemulai aku belajar di menua tasik dalam taun 1993.
“Tang ba aku empu, aku ngelakuka asil pantang nya bepanggai ba utai ke udah digaga tauka dipantang ba kulit laban nya dipeda nyengenda. Sida ke udah dipantang ulih mantu mandang sereta nusui ngagai orang bukai ke udah meda asil ke digaga aku nya. Chara tu ke ngangkatka penyulut ti diasaika aku sehari tu.
“Ku penemu aku, nengah media sosial nya semina dikena mantaika aja,” ku iya ti udah abis bejalai serata dunya ngelakuka, ngayan sereta ngetanka identiti bansa Iban.