Nanta meri pengaga ati ngagai 22 nembiak ari Kapit ke masuk MRSM

KAPIT: Sapit Menteri Pemansang Menua Pesisir Enggau Kandang Menua, Datuk Alexander Nanta Linggi meri pengaga ati ngagai bala nembiak sekula ari Pelilih Kapit ti mujur dipilih nampung pelajar ba Maktab Rendah Sains Mara ( MRSM) ungkup renggat keterubah taun tu.

ku iya, kreteria dikena ngulihka diri ulih nampung pelajar ngagai MRSM iya meseti semua A dalam Ujian Penilaian Sekolah Rendah ( UPSR).

Taja pia, pinta baru ungkup nembiak sekula menua pesisir di Sarawak ditendurka agi, sida enggau pemutus 4A tauka 3A 2B mega tau minta. Atur tu ngambika meri awak ngagai nembiak ke nyulut ari sitak menua pesisir ngambi nampung pelajar di MRSM.

“Tu siti ari pengawa dipejalaika perintah nengeri MARA dikena mantu nembiak sekula Bumiputera ngulihka pelajar ti menyana ba mayuh bengkah MRSM.

“Aku lantang endar diatu laban mayuh nembiak nampung pelajar ba MRSM. Apai indai sida meretika konsep pemanah pelajar ti disediaka MARA nengah MRSM enggau universiti belajar dikena ngiri penemu enggau pengelandik.

“Pengelebih belajar di Mara, iya nadai bebayar ke alai apai indai ulih ngelimat mayuh belanja. Ba pekara bukai, nyema nyali ari Perbadanan Tabung Pinjaman Pendidikan Nasional ( PTPTN), meseti dibayar pengudah graduet,” ku Nanta nerang, lebuh bejadika Pengawa Nyuaka Surat Pinta Nampung Pelajar Ngagai Nembiak Ke Dipilih Tama Ngagai MRSM di Rumah Benggau Anak Andah, Nanga Sut, Baleh, ditu, kena lemai Hari Lima tu tadi.

Taun tu bisi 22 iku nembiak ari Kapit dipilih nampung pelajar ba mayuh bengkah MRSM di nengeri tu.

Sida tu iya nya Wiro Andy Alfred, Lorenzo Lopez Wong, Kasmaddana Lika Ningkan, Gabriella Gelinggie Raymond, Angelina Enttalang, Mike Fernandez Kejom, Nurul Dhaniyah Maisarah Rosmadi, Arthur Rossy Jantan Anthony, Ellira Adani Francis Elli, Ezryana Ezreen Sipang, Rooney Ricky Jamson, Ernesstine Jane Lawrence, Nisclatiuna Bawa Augustine, Fster Gura Lachau, Felicia Shandy Aziz Maulana, Mike Michael Edwin Lang, Vianney Vera Desmond Paul, Emellin Challa Wan, Hendrick Benas Edeni, Marseila Uju, Edrienna Ulong Edmund enggau Kenjurich Ray Uka.

Desmond Paul, iya nya apai Vianney Vera, 13 taun, meri terima kasih ngagai perintah udah meri awak nampung pelajar ngagai anak iya di MRSM. Iya andal amat anak iya deka nyapai penyulut laban sida datai ari nembiak bulih pemutus UPRS ti nyulut.

Ba lansa bukai, Pemesai MARA Pelilih Sibu, Mohd Razib Mohd Tahir, madahka ba taun 2018 bisi 22 iku nembiak sekula lepas UPSR dipilih nampung pelajar di mayuh bengkah MRSM di Sarawak, sekalika di Mukah, Betong tauka Kuching. Kesemua sida ari Sarawak bisi 488 iku lalu 7770 iku ari serata menua.

Ku iya nambah, bisi tiga bengkah MRSM di Sarawak lalu 54 di menua.

Kaban Kunsil Nengeri ( ADUN) Pelagus Wilson Nyabong Ijang enggau ADUN Bukit Goram Jefferson Jamit Unyat mega bisi mansutka jaku rambau atur progam nya.

Sekretari Politik Kepala Menteri Sarawak – Nicholas Kudi Jantai enggau Tapah Ata, Pemesai Pengatur Pengawa Opis Residen Kapit ( Pekara Pemansang) Belayong Pok, Pemangka Pemesai Pelilih Kapit Anyie Awing sereta bala bukai ke bisi begempuru di Rumah Benggau ngulu program sehari nya.