Taman Seri Puteri disedia ungkup indu ti kena ayah sebedau kawin
KUCHING: Taman Seri Puteri ke didiri di Telaga Air ditu nyadi palan ke pemadu engkeman ungkup bala nembiak indu kena ayah ngenduh.
Digaga ba taun 2002, taman tu ngemunka operasyen ba bulan April 2006 lalu diuan 100 iku orang maya nya.
Ketuai Taman Seri Puteri, Rimawati Hamdan madah kelimpah nyendia tempat ngenduh, taman mega nyendia servis pengelandik ngagai bala nembiak.
“Tajapan penyampau nembiak ke diau di taman tu enda mayuh iya nya semina lapan iku aja, tu ukai tanggungpengawa ke mudah ungkup kitai.
“Tu ketegal sida ke dipasuk ba taman tu bekaul enggau Seksyen 41 Akta Kanak- Kanak 2001 iya nya minta dipasuk, pinta ari apai indai tauka orang nyaga ketegal betubuh bisi sebedau jadi tauka kes seksual.
“Tanggungpengawa kitai ukai semina nyendia endur ngenduh ungkup sida ngambika enda diayah, tang ke berat iya nya nyikap sida enggau manah ngambika ulih mujur ba pengidup pengudah pansut ari taman tu dudi hari ila,’ku iya.
Iya mansutka jaku nya ba jaku penerang rambau penemuai kereja Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak Datuk Seri Fatimah Abdullah ke palan nya kemari.
Rimawati nambah entara program ke disedia ungkup sida ke diau ngenduh iya nya program program akademik sereta vokasional baka ke tuisyen SPM enggau PT3, pengelandik nyait enggau kulinari.
Program bukai nyengkaum kaunseling bebala mayuh enggau seseiku, main sereta lumba, rekreasyen sereta pelajar moral enggau agama.
“Siti agi servis ke disedia ditu iya nya Pusat Jagaan Sinar Kasih (PSJK) ti ngemunka operasyen ba bulan Oktober 2010.
“PJSK tu ungkup nembiak indu beumur 18 taun ke betubuh bisi ulih endur ngenduh sereta ngintu kandung nyentukka beranak ngambi ulih nyeliah kes muai anak,”ku iya.
Ku iya nambah servis nya udah lama disedia tang mengkang mayuh orang enda nemu palan nya bisi ditumbuh.
Berindik enggau nya, iya ngarap mensia mayuh ulih nemu palan nya udah ditumbuh lalu ngarapka sida ke begunaka bantu ulih diintu enggau manah.