Semua ketuai polis pelilih menua deka dikangau berandauka pekara PRU ke deka diatur sebarang maya

SIBU: Polis nengeri tu udah nyikap diri napi Pengawa Bepilih Besai Ke-14 ( PRU14) ti deka diatur sebarang maya.

Kepala Polis Sarawak Datuk Sri Amer Awal madah, iya deka betemu enggau semua Ketuai Polis Pelilih Menua (KPD) berandauka pekara ti bekaul enggau PRU serak tu.

“Kitai udah besedia napi PRU ti deka datai tu. Diatu mega aku deka nentuka semua pelilih menua bisi KPD,” pia ku iya madah maya ngemataka pengawa besilih penuduk nyadi KPD Sibu ke baru ba Indu Opis Polis Sibu ditu, kemari.

Ba pengawa nya Pemangku Asisten Komisioner Polis ( ACP) Stanley Jonathan Ringgit dipadu nyilih ACP Zailanni Amit nyadi Ketuai Polis Pelilih (KPD) Sibu.

Amer madah, naka kediatu KPD ba pelilih Meradong, Lubok Antu enggau Saratok agi ba proses besilih pangku pengawa.

Maya ba pengawa nya, Stanley, 56, ba jaku iya madahka diri besedia bejalaika tanggungpengawa ngintu sereta nyaga pengelikun mensia mayuh ba mengeri tu.

Iya peranak asal pelilih Saratok keterubah iya gawa ba Kuala Lumpur ba pengelama 17 taun.

“Sebedau tu mega aku kala gawa ba Opis Polis Kanowit lalu nangkan ke nya pindah gawa ba ke Bintulu lalu kepenudi tu nyadi Sapit KPD Miri,” ku iya madah.

Zailanni ti nyadi KPD Sibu ba pengelama tiga bulan 18 hari maya tu meri jaku terima kasih ngagai raban polis ti udah gawa enggau iya.

“Ngarapka kita mengkang ngetanka pemanah gawa baka sebedau tu kelimpah nyungkakka pengeransing diri ba baruh pegai ketuai baru.

“Pia mega terima kasih ngagai piak media ti bekerejasama ngayankan pengawa polis ngelama tu,” pia ku iya.

Bela datai ngemataka pengawa tu iya nya Ketuai Opis Nasat Penyalah Nengeri Datuk Dev Kumar sereta semua KPD ba nengeri tu.

Kitai udah besedia napi PRU ti deka datai tu. Diatu mega aku deka nentuka semua pelilih menua bisi KPD. Datuk Sri Amer Awal Kepala Polis Sarawak