Majoriti peranak Sibu udah nemu pasal RS1
SIBU: Majoriti peranak Sibu diatu udah nemu pasal Langgur Sibu 1 ( RS1) – pelin pemansang lima taun (2018 – 2022) keterubah ungkup mengeri, ti nguing ngagai kandang menua ke beguna endar.
Chairman RS1 Dato Andrew Wong Kee Yew madah nengah pengawa ngelaku ti seruran dipejalaika sida di Youtube enggau Facebook – bala sida ulih nyapai sereta ngulihka penerang ari rayat.
“Nya alai, mayuh sida diatu nemu (RS1 enggau batang tuju iya). Sida nemu tu pelin lima taun taja bisi sekeda nyangka enda nemu silik pasal pelin lima taun tu.
“Abis nadai, sida nemu kami bisi pelin lima taun – aku ngasaika tu pekara ti beguna endar,” ku iya madah ngagai thesundaypost lebuhka dirandau ba kaunter servis mindah kin kitu di palan besai bebelika barang Ulu Sungai Merah ditu, kemari.
Sama bisi datai Sapit Chairman Pemansang Rama Komuniti Kaunsil Servis Komuniti Parti Rakyat Bersatu (UPP) Sibu, Andrew Ting enggau Sapit Chairman Infrastruktur, Kapitan Toh Jack Kuong.
Wong mega bisi ditanya pasal pekara penyedar ngagai peranak mengeri pasal RS1.
Ku iya, batang tuju RS1 dikena ngelanggur pelin besai pemansang ungkup Sibu berengkah ari 2018 ngagai 2020, nentuka mengeri enggau peranak iya mereti sereta bekunsika tuju ngemansangka Sibu dudi hari.
Ba rikod, langgur RS1 Kaunsil Servis Komuniti UPP dikena nentuka penegap ba pemansang sereta nempa peluang ungkup raban nembiak di Sibu.
Pelin pemansang lima taun keterubah ungkup mengeri tu ditibak ari penemu Wong, ke mega chairman kaunsil.
Kelimpah ari nya, kar pejalai deka ngemeratka tiga industri baru ti kritikal – dagang temuai, betanam betupi enggau e-dagang – dikena nyediaka raban nembiak enggau mayuh peluang ti ulih ditangkup sida di mengeri.
Ba lansa bukai ku Wong, kaunter servis mindah kin kitu nyadi aktiviti ti dipejalai ngaul rat rayat.
“Nya alai, kitai gawa ngagai menua meretika penanggul ditapi rayat sereta mega ngasuh sida nemu pasal RS1” ku iya nambah.
Kelimpah ari nya, ku iya, servis pemun baka beperesa mata, peresa darah enggau gula dalam darah enggau nadai bebayar disedia nyadi sebagi ari servis komuniti sida.
“Tu ke amat sebagi ari pelin RS1 kami.”
Ku Wong, kaunter servis mindah kin kitu sida deka dibuka di Kampung Sentosa sehari tu, berengkah ari pukul 9 pagi nyentuk tengahari.
Kena 13 Januari – tim nya deka bisi di Kampung Jeriah, palan besai bebelika barang Jalai Belatok (14 Januari), palan besai bebelika barang Delta Swimming Pool– ba mua Happiness Café ( 20 Januari).
Ku Wong, endur kepenudi sida deka diatur di Kampung Bahagia Jaya kena 21 Januari.