Tun Mahathir mengkang ulih nyadi ketuai menua
KUCHING: Chairman Parti Keadilan Rakyat ( PKR) Sarawak Baru Bian netapkan Tun Mahathir ngembuan pengelebih sereta mengkang ulih nyadi ketuai menua.
Bejaku ba aum pengarang berita di Kuching kemari, iya madah tajapan dikumbai ketuai ‘ kitar semula’, Tun Mahathir siku ketuai ke tegap runding.
Kelimpah ari nya ku Baru ke nyadi ADUN Ba’ Kelalan, Tun Mahathir ngembuan visyen ke nyata.
“Ke pemadu beguna amat, menteri besai ke dulu suba tu ngembuan pengelebih iya nya ulih matak undi rayat kelebih agi peranak di Semenanjung Malaysia nyukung PH,” ku Baru.
Iya nambah, Tun Mahathir ukai isu ketuai ‘ kitar semula’ tang ke amat sentang pelin PH ti deka merintah menua pengudah Pengawa Bepilih Besai Ke14 ( PRU14).
Pakatan Harapan Menua kena Hari Minggu ( 7 Januari) mansutka penerang ke alai Tun Mahathir dichiri nyadi chalun Menteri Besai enti PH megai kuasa pengudah PRU14.
Penerang PH nya balat dikejaku ketuai dalam Barisan Nasional ( BN) ke alai sekeda meri gelar ketuai ‘ kitar semula’ ngagai Tun.
Ngenang kaul ke sama, Baru madahka Tun deka mangku pengawa nyadi menteri besai enda lama lalu deka diganti Datuk Seri Anwar Ibrahim ti disadang pansut ari jil ba bulan Jun 2018.
“Dipelaba urung 2 tauka 3 taun Tun mangku pengawa menteri besai, bepanggai enggau atur ngenah, meri awak Anwar nganti.
“PH bisi perambu minta Agong ngampun Anwar lalu meri awak ngagai iya nganti Tun Mahathir nyadi Menteri Besai ke 8,” ku baru.