Fatimah, Rentap dipelaba nyilih Empiang seduai Fadillah ba penuduk dalam PBB
KUCHING: Tan Sri Empiang Jabu ngelengka pangku pengawa nyadi Ketuai bagi Orang Indu Parti Pesaka Bumiputera Bersatu (PBB) pengudah 10 taun ngembing bagi nya.
Pemutus Empiang nya dipansutka Kepala Menteri Datuk Patinggi Abang Johari Tun Openg ba aum pengarang berita pengudah ngulu aum kunsil besai parti di Kuching kemari.
Empiang ti dikerandau pengudah nya madah diri berasai temegah sereta gaga ulih ngelengka penuduk nya lalu pechaya ketuai ti nganti iya ulih bejalaika tanggungpengawa nya enggau manah.
Ku iya, bagi Orang Indu PBB udah majak ngerembai lalu deka majak mansang jemah ila.
“Aku berasai gaga ulih ngelengka pangku pengawa ketegal ti udah meri servis enggau mujur lalu ngembing parti manggai ba ikas ke diatu.
“Bagi Orang Indu PBB udah majak ngerembai ke alai mayuh ketuai ari pampang tu ngembuan pengering sereta pengelandik nganti aku,” ku iya.
Empiang mangku pengawa nyadi ketuai Orang Indu berengkah ari taun 2007, lalu iya mega udah mangku pengawa nyadi sapit ketuai orang indu berengkah ari taun 1984.
Ngenang kaul ke sama, berita didinga ke alai Sapit Ketuai bagi Orang Indu PBB, Dato Sri Fatimah Abdullah ari pampang Bumiputera diadang nganti Empiang.
Fatimah lebuh dikerandau madah pemutus sentang pekara nya dilempai ba kepala menteri ke mega presiden PBB.
Ku iya, PBB ngembuan runding ti seruran angkun sereta mendingka jaku ketuai.
“Bagi Orang Indu PBB ngelempaika pekara tu ngagai kepala menteri ke mega presiden PBB,” ku Fatimah.
Kemari mega, Abang Johari bisi mantaika penerang ke alai Ketuai bagi Nembiak PBB, Dato Sri Fadillah Yusuf bela deka ngelengka pangku pengawa.
Berindik enggau nya, raban dalam parti ngadang pangku pengawa nya deka diberi ngagai Sapit Ketuai Bagi Nembiak Gerald Rentap Jabu ari PESAKA.
PBB deka ngadu Aum Besai parti berengkah 8 nyentuk ngagai 11 Februari 2018 lalu deka dipenyadi Menteri Besai Datuk Seri Najib Tun Razak.