PH Sarawak nyukung Tun Mahathir dichiri nyadi chalun Menteri Besai

KUCHING: Pakatan Harapan (PH) Sarawak nyukung penerang ke dipansut Pakatan Harapan Menua kena Hari Minggu (7 Januari) ke alai Tun Mahathir dichiri nyadi chalun Menteri Besai, enti PH megai kuasa pengudah Pengawa Bepilih Besai Ke-14 (PRU14).

Chairman PH Sarawak Chong Chieng Jen mega andalka atur kedua PH iya nya minta Agong ngampun Datuk Seri Anwar Ibrahim lalu meri awak ngagai iya nganti Tun Mahathir nyadi Menteri Besai ke 8.

“Atur ngalahka UMNO sigi begunaka Tun Mahathir, nadai orang bukai.

“Iya dipebasa sereta dikearap peranak melayu lalu pengelebih tu tu enda dikembuan ketuai bukai dalam PH,” ku Chong ba aum pengarang berita di Indu Opis DAP ditu, kemari.

Chong ke mega Chairman DAP Sarawak nambah PH mega udah setujuka agih penuduk ngagai tetiap parti dalam gempung nya.

Ba PRU14 tu ila ku iya, Parti Pribumi Bersatu Malaysia ( PPBM) diungkup 52 penuduk, Parti Keadilan Rakyat (PKR) 51, (DAP) 35 enggau Parti Amanah Negara (AMANAH) diungkup 27 penuduk.

Iya pechaya PRU14 gempung Tun Mahathir enggau Anwar deka nyatup gempung Najib enggau Hadi Awang.

“Berindik enggau nya, PH Sarawak ngelalau semua peranak Sarawak meri sukung ngagai PH ngambika ulih nukar perintah.

“Pengawa bepilih ti deka datai meri reti ke besai ketegal ulih nyeliah Malaysia ari perintah kleptokrat,” ku iya ke mega MP Bandar Kuching enggau ADUN Kota Sentosa.

Chong nambah, entara sekeda atur ti deka dipejalai PH enti megai kuasa iya nya, pangku pengawa menteri besai enda tau lebih ari dua renggat.

Menteri besai enggau menteri pekara wang enda tau orang ke sama, tandu Chong.

Bela datai chairman PKR Sarawak Baru Bian.