S’wak alai ngatur Seminar Psikologi Lumba enggau Latih Antarabansa Ke-5
KUCHING: Dikena nyapai juluk bulih gelar antara nengeri kuasa lumba pemadu besai di menua tu, Sarawak diatu nyadi palan alai ngatur Seminar Psikologi Lumba enggau Latih Antarabangsa Ke-5 2018.
Menteri Muda Nembiak enggau Lumba, Datuk Snowdan Lawan madahka, seminar tu diatur dikena nambahka tikas profesional pematih lumba di nengeri tu.
Ku iya, seminar tu asil kerejasama Opis Menteri Dagang Temuai, Seni, Main Asal, Nembiak enggau Lumba, Komiti Besai Lumba Sarawak (SSC) enggau Institut Pematih Pengajar Kampus Tun Abdul Razak (IPGTAR) Kota Samarahan.
“Endang nyadi juluk kitai nempa Sarawak antara nengeri kuasa lumba pemadu besai di Malaysia lalu seriris enggau pengawa nya, kitai ngatur bemacham program enggau pekit renggat antarabansa nyengkaum pengawa ngatur seminar tu.
“Ari pengawa ngatur seminar tu, kitai ulih nambahka tikas pemanah pengawa bala pematih ari raban pematih kitai sereta nambahka tikas profesional sida dalam psikologi lumba enggau sesais,” ku iya.
iya mansutka jaku nya rambau aum pengarang berita pengudah ngatur aum begulai enggau komiti pengatur Seminar Psikologi Sukan dan Latihan Antarabangsa Ke-5 di Stadium Negeri ditu kemari.
Ngelansa silik pasal seminar nya, ku Snowdan, iya deka diatur 6 enggau 7 Februari ila di Hotel Grand Margherita Kuching.
Pia mega ku iya, seminar tu mega deka ngemai 14 panel menua tu enggau menua luar baka Korea Selatan, Jepun, Taiwan, Hong Kong enggau Thailand, bekunsika tips enggau peneleba dalam psikologi lumba enggau sesais.
“Seminar tu disukung Serakup Psikologi Lumba Pasifik Selatan Asia, Gerempung Psikologi Lumba Antarabansa, Serakup Psikologi Lumba Malaysia enggau kerejasama Gerempung Serakup Antarabansa Pelajar Fizikal Asia, Universiti Sains Malaysia enggau Universiti Malaysia,” ku iya nerang.
Nya alai, iya ngelaluka penyereta ari raban pematih lumba di nengeri tu ngulu seminar tu ila.
Ba lansa ke bukai, Ketuai Pemesai Esekutif SSC Dr Ong Kong Swee ku iya, bayar nyereta seminar tu penyampau RM350 dikena rejista tumu ari timpuh diatu nyentuk 30 Januari.
“Bayar baka ngelama tu mega penyampau RM400 siku lalu penerang silik, mensia mayuh tau ngelawa website www.majlissukannegerisarawak. com tauka www.ssc.sarawak.gov.my,” ku iya.
Kelimpah ari nya, mensia mayuh mega tau telefon nuju Dr Ong Chin Ngien Siong ba lumur 019-8586898, Dr Ong (016-8626509) enggau Dr Clarence Jerry ( 0138067122).