Bansa Bidayuh bela sepenemu deka bekimpin ngena nama BN maya PRU
KUCHING: Bansa Bidayuh udah selubang penemu deka ngena Barisan Nasional (BN) lalu ukai ngena nama parti politik, lebuh maya bekimpin ba pengawa bepilih besai (PRU) ke deka datai.
Pekara nya dipadahka Mandal Parti Pesaka Bumiputera Bersatu (PBB) ti mega Menteri Pelajar, Sains enggau Pansik Teknologi, Dato Sri Micheal Manyin Jawong, kemari.
Iya madahka taja bansa Bidayuh masuk mayuh bengkah parti komponen BN tang sida udah netapka penemu ngena nama BN.
“Kami bansa Bidayuh udah setuju lebuh kimpin pengawa bepilih, kami enda ngena nama parti agi.
“Ambika chunto, YB Datuk Dr. Jerip Susil ti bediri minta pilih DUN Mambong, iya ukai ngarika parti UPP tang ngarika bansa Bidayuh nengah BN,” ku iya ti mega Kaban Kunsil Nengeri (ADUN) Tebedu.
Manyin mansutka pekara nya dalam jaku pengelalu Aum Deligit Pampang Tiga Taun Sekali PBB Zon 3 ke diatur ba Dewan DBNA ditu, kemari.
Aum besai nya udah mujur dipenyadika Presiden PBB ti mega Kepala Menteri Datuk Patinggi Abang Johari Tun Openg, ti disempulang bini iya Datin Patinggi Datuk Juma’ani Tun Tuanku Bujang sereta digulu ketuai renggat tinggi dalam PBB ke bukai.
Bejaku baru Manyin madahka bansa Bidayuh deka terus bediri dibelakang Abang Johari sereta nyukung semua polisi ke dipejalaika iya.
“Kami besemaya maya Pengawa Bepilih Besai (PRU) enggau Pengawa Bepilih Negeri (PRN), bansa Bidayuh deka terus meri sukung tegap ngagai BN,” ku iya.
Berebak enggau tu ngarapka perintah ulih mantu beberapa kandang endur Bidayuh ke bedau disambung jalai alun, bedau dibekal elektrik enggau ai ulih disedia dalam timpuh ke jampat.