Kaban SUPP diperansang seruran bekerejasama enggau pangan diri

SRI AMAN: Menteri Muda Pengelantang Komuniti Sarawak, Datuk Francis Harden Hollis dekaka bala kaban Parti Sa’ati Rayat Sarawak (SUPP) ditu seruran bediri teguh di belakang parti tu nentuka parti meruan tegap begulai enggau komponen parti Barisan Nasional (BN) ke bukai.

Kenu ku iya, penegap parti bepanggai ba penyampau tubuh kaban di baruh pegai parti nya.

“Ukai semina nya aja, kere- jasama rat antara kaban parti enggau bala ketuai parti mega nentuka penegap enggau peneguh parti nya,” ku iya.

Iya mansutka jaku nya lebuhka bejadi ba Aum Kaban Komiti Parti SUPP Pampang Engkilili semak ditu, kemari.

Harden ke mega Kaban Kunsil Nengeri ( ADUN) Simanggang nerangka SUPP nyadi sebuah parti komponen BN pemadu tuai di Sarawak.

“Aku meri terima kasih besai ngagai semua kaban SUPP ke bisi di serata Sarawak la- ban agi taluk begulai enggau SUPP dataika sehari tu,” ku iya nerang silik.

Berebak enggau nya, Harden mega ngarapka bala kaban SUPP Pampang Engkilili merisukung tegap ngagai bala ketuai parti ke bisi ngambika parti meruan teguh begulai enggau parti komponen BN ke bukai.

“Aku ngarapka kaban Komiti Besai ti baru dichiri ulih bekerejasama ungkup pengering parti sereta meri servis ngagai rayat pupu bansa,” tandu iya nyemetak.

Iya mega andal amat tetiap iku kaban regas gawa nadai ngira penguntung diri empu.

Rambau aum nya, Harden mega bisi nyuaka geran perintah ari Menteri Kaunsil Kandang Menua Sarawak, Datuk Profesor Sim Kui Hian ngagai Komiti Pemansang enggau Pengelikun Genturung Pendiau (JKKK) Rumah Samai, Semueh, Batu 4 penyampau RM6,000 seraya JKKK Rumah Cerang, Lipat Skrang nerima RM9,000.