Profesionalisme, integriti meseti seruran dikemeran
KAPIT: Residen Bagi Menua Kapit, Joseph Belayong ngelalau semua ketuai opis perintah ngambi nerang ngagai bala staf sida idup bepelasarka penatai pemisi diri dikena ngetanka integriti ba pemanah ulah enggau disiplin, nyeliahka diri ari penyalah makai suap.
Kena Hari Lima tu tadi, iya udah ngemataka semua ketuai opis perintah nengeri enggau perintah besai ngangkat sumpah integriti ba pengawa ngemunaska penyalah makai suap antara orang gawa perintah enggau mensia mayuh.
Belayong mansutka jaku tu ngagai pengarang berita pengudah iya bejadika Pengawa Ngangkat Sumpah Nadai Makai Suap Di Renggat Bagi Menua enggau Pelilih Kapit kena pagi 12 Januari diatur di balai konferen di Kompleks Nengeri Bletih ditu.
“Pengawa tu diatur Perintah Nengeri Sarawak ti berengkah dipejalai dalam bulan Januari 2017. Kepala Menteri Sarawak balat ngemeratka isu makai suap di nengeri tu. Pengawa ngangkat sumpah integriti enggau anti-makai suap dipejalai ba semua serak orang gawa perintah,” ku iya.
“Profesionalisme enggau integriti meseti dikemeran ba semua kereja kitai besehari sehari. Ambika chunto, sebarang projek dipejalaika ejensi perintah nyema enda dipejalai memanah, tu deka meri pangka enda manah ngagai rayat.
“Iya mega ngamahka nama opis lalu tu deka mangka ekonomi menua. Nyema ejensi bejalaika projek tu nerima suap, pemanah kereja baka ngaga jalai tauka berumah deka enda nyapai standard. Tu ngemai pengerugi ngagai rayat sereta ngamanahka nama perintah,” ku iya.
“Nyema mensia mayuh meda orang gawa perintah nadai ngembuan integriti, sida deka madah nadai integriti dalam perintah. Nya kebuah, aku ngarapka semua peranak di Kapit, kelebih agi orang gawa perintah seruran gawa enggau integriti.
“Aku ngarapka kita idup enggau meruan. Anang sesekali nunda gaya idup sida ke kaya. Aku minta semua ketuai opis meretika jaku tu enggau terang, anti-makai suap, semua orang gawa perintah gawa enggau disiplin ke manah sereta integriti tinggi. Aku ngarapka sida deka madah ngagai staf sida, ari pemekai kanan ngagai staf sokongan. Aku mega ngarap enggau pengeran tu, opis perintah di Kapit deka nadai napi penyalah makai suap,” ku Belayong nangkan.
Iya nyimpul enggau pengawa ngangkat sumpah me- seti dipebasa sereta meruan dikemeran dalam pengidup.
Seraya pemesai ari SPRM Sibu, Badli Shah Shamin meri licha ngagai 200 iku orang gawa perintah pasal mayuh bengkah pekara ba definisyen makai suap.
Iya bejuraika licha pasal Nama Reti Makai Suap?, Definisyen Ulah Makai Suap ( Seksyen 3, Akta SPRM 2009), Pangka penyalah makai suap ngagai perintah enggau menua, Ukum (Jurisdiction – AG Chamber).
Badli minta mensia mayuh meri kerejasama ngagai SPRM enggau ngeripot sebarang pengawa ti salah antara opis tauka mensia mayuh. Ripot patut belalauka penerang; Nama pekara ke nyadi, Kemaya (jam enggau hari bulan), Endur, Nature, Sapa ke dikaul, Sebarang saksi.
SPRM ulih dilawa nengah telefon ba lumur 03–8886 7000, Fax 03-8888 9652 tauka email info@ prm. gov. my. Opis Sibu 084–321982 tauka 084–311 982.
Pemesai SPRM Anan Swanlerd A/L Endeng, Pemesai Pelilih Kapit Elvis Didit, bala pemeksai ari Opis Residen enggau Opis Pelilih – Belayong Pok, Wee Teck Min, Ireng Merang, Bidah Lujah, Rolyn Terrance, sereta bukai antara 200 iku ke bisi datai ngulu program nya.