Musim ujan enda nekul Kelvin ngabas peranak Lanang
SIBU: Pejalai chalun Parti Sa’ati Rayat Sarawak (SUPP) ke dikeandal deka disabung ba Parlimen Lanang, Kelvin Kong nadai bepenanggul taja diatu musin ujan.
Empai lama, iya enggau raban parti iya nujah ai besai maya ke niki Rumah Mai Sigai ba Assan Tengah ditu.
Iya madah, Rumah Mai empai datai jalai alun lalu semina ulih dilawa ngena perau aja.
Ku iya ti mega Sapit Chairman SUPP Pampang Dudong, tuju penatai iya maya nya laban deka mending sereta meda kediri empu nama penusah ke bisi nating rayat.
“Udah datai ditu kitai meratika sida ditu patut digagaka titi enggau pendai ke manah agi laban iya ke diatu suah ampuh ai ninting maya musin ujan.
“Pengelikun sida meseti dikemeratka lebih agi bala nembiak enggau sida ke tuai lalu kitai nguji ngaga dua bengkah pekara tu,” ku iya sambil madah penanggul rayat nya nyadika kebuah iya enggau bala raban parti ke bukai ngelawa rumah panjai nya.
Kelvin mega madah, SUPP deka minta ngagai piak bekaul nyambung karan enggau ai paip beresi ngagai peranak Rumah Mai.
Iya madah, tu deka nentuka pengelikun pengerai rayat dia ari bekenaka ai ti beresi kelimpah karan beguna bendar ngelantangka pengidup nyengkaum ngemuntangka bala nembiak sekula belajar maya malam hari.
“Naka ke diatu aku semina nemu Rumah Mai aja empai datai jalai alun ba Parlimen Lanang.
“Ari Sungai Assan kitai ulih ngena jalai kebun besai Tan Ann Oil Palm ngelawa Rumah Dumin lalu ari Rumah Dumin kitai merau kira 10 minit sebedau datai ba Rumah Mai,” ku iya nerang.