Pendiau paspot baru nya lebih moden sereta likun ungkup penguna
SIBU: Opis Imigresyen nyengkaum sida ke gawa ba Palan Transformasyen Mengeri (UTC) di serata Sarawak dipelaba ulih ngeluarka paspot baru dalam sebulan da agi.
Sapit Menteri Dalam Menua (KDN) Datuk Masir Kujat madahka indu opis di Putrajaya udah nganjung paspot enggau pendiau pengelikun ti moden ngagai opis iya di Kuching ngambika disadung ngagai opis ti bepalan di UTC di serata nengeri.
Taja pia ku iya, nitih ku Direktor Besai Imigresyen Datuk Seri Mustafa Ali, opis di Kuching enggau Sri Aman udah ngeluarka paspot bansa baru nya.
“Pengawa tu udah dipejalai berenggat di semua opis selampur Sarawak. Pengudah Kuching enggau Sri Aman, kitai deka ngalih ngagai Limbang, Miri, Bintulu, Sibu enggau opis ke bukai nyengkaum palan ngeluarka paspot di UTC.
“Dikearap tu ulih dipejalai dalam kandang sebulan da agi tauka udah nya,” ku Masir madah ngagai thesundaypost lebuhka dirandau .
Iya ditanya sekalika paspot bansa baru enggau ciri-ciri pengelikun nya diatu mega bisi ungkup mensia mayuh di Sarawak maya sida minta ngemaruka dokumen pejalai sida.
Nambahka nya, Kaban Parlimen (MP) Sri Aman pechaya paspot bansa bantu deka mantu ngurangka ngenchuri dokumen pejalai.
“Nyema bisi orang ngenchuri paspot tu, iya enda ulih ngerusak tauka nusun iya laban iya disikap ngena ciri-ciri pengelikun moden nengeri,” ku iya nambah.
Ungkup rikot, ciri- ciri pengelikun baru nyengkaum laman penerang diri polikarbonat enggau chip sereta ngenukuka pengamat paspot ti semina tau ditemu nengah cahaya ultraviolet (UV).
Masir mega ngingatka pemenggi paspot ngambika nyaga memanah dokumen pejalai sida.
Iya ngelalau sida ke lenyau paspot ketegal penusah baka penusah angus, ampuh bah tauka dichuri meseti jampat ngaga ripot polis.
Ba lansa ke bukai, Sapit Menteri Besai Datuk Seri Dr Ahmad Zahid Hamidi kena Hari Empat tu tadi udah ngelancharka paspot Malaysia enggau pendiau pengelikun moden rambau gempuru ninting bulan di Opis Menteri Dalam Menua di Putrajaya.
Ahmad Zahid, ke mega Menteri Muda Dalam Menud, udah madahka ciri-ciri pengelikun canggih deka nagang pengawa niru enggau salah guna orang ti nadai tanggungpengawa.
Iya mega dipadah bisi nyebut nadai bayar tambah deka dipinta ba dokumen pejalai baru.
Nitih ku Bernama, paspot bansa baru nya dibai kelala kena 15 November taun nyin tadi. Bayar ba peminta ngemaru paspot iya nya RM200.