Sida patut nerenak pengelandik ba penemu digital, numbuhka dagang teknologi pemadah besemekih enggau peranak global
SIBU: Saup ari raban nembiak ba ekonomi digital (DE) kelebih agi di Sibu beguna bendar dikena ngemujurka pemansang penatai pemisi ke manah agi.
Menteri Dagang Antarabansa enggau E- Dagang Dato Sri Wong Soon Koh madah, tu bela randaka bala nembiak ngembuan pengelandik ba penemu digital lalu numbuhka dagang teknologi pemadah begulai enggau peranak global.
“Kitai di Sarawak bisi urung 2.7 juta iku lalu tu nejuka sektor dagang kitai mit laban kitai enda ulih semina bepanggai ba pengawa ti bekenaka pengeraja asal aja.
“Nya alai, enti kitai deka mansang sereta rayat bepenatai pemisi tinggi, kitai enda ulih nyeliah tang meseti ngemansangka diri nengah dunya digital,” pia ku iya madah.
Iya mantaika jaku tu maya bejadi Program Hari Tebuka Beli-Beli 24 Summit 2018 ba Dewan Suarah Sibu, kemari.
Wong ti mega Menteri Wang II maya tu madahka ubah ekonomi digital udah berengkah di menua Malaysia lalu Sibu mega enda ditinggalka.
Ketegal nya, ku iya, Kepala Menteri Datuk Patinggi Abang Johari Tun Openg balat ngemeratka pekara pemansang ekonomi digital ba nengeri tu.
“Iya semampai nyebut pekara bekaul enggau ekonomi digital.
“Kemari ( ensana) mega maya Gempuru Besai Parti Pesaka Bumiputera Bersatu (PBB) Ke-14 di Kuching, iya sekali agi mantaika pekara ke sebaka,” ku iya ti mega Kaban Kunsil Nengeri ( ADUN) Bawang Assan.
Wong maya tu mega madah, ekonomi digital tu udah ngubah chara mensia mayuh bebayar tauka bebelika barang enggau chara dagang dipejalaika.
Iya madah, semua tu ngemuntangka chara dagang ti enda ngira maya tauka dini alai pengawa nya dipejalaika.
“Ketegal nya, kitai anang dudi ari orang bukai ngemansangka diri ngelawa ekonomi digital,” ku iya madah baru.
Bela datai maya tu iya nya ADUN Dudong ti mega Chairman Opis Kaunsil Sibu (SMC) Datuk Tiong Thai King, Sapit Residen Sibu Wong Hee Seng enggau Sapit Chairman SMC Rogayah Jamain.
Kitai di Sarawak bisi urung 2.7 juta iku lalu tu nejuka sektor dagang kitai mit laban kitai enda ulih semina bepanggai ba pengawa ti bekenaka pengeraja asal aja. Dato Sri Wong Soon Koh Menteri Dagang Antarabansa enggau E-Dagang