PPMGS deka nambahka pemanah tikas gawa pekereja minyak, gis
SIBU: Serakup Pekereja Minyak Enggau Gis Sarawak (PPMGS) ti ditumbuh kena 30 Ogos taun nyin tadi deka nambahka pemanah tikas gawa ngagai bala kaban dalam bidang minyak enggau gis.
Chairman iya, Jamal Abdullah madah, dikena ngepun PPMGS deka bejalaika pansik bekaul enggau penyampau rayat Sarawak ngaul diri dalam industri minyak enggau gis, mega mungkur raban ngatur kereja dataika pekara operasyen.
Tuju iya ngemuntangka PPMGS ngeripih program pemansang nyengkaum pengawa ngatur kus teknikal enggau kompetensyen ti bekaul enggau operasyen minyak enggau gis di kandang tebing tasik Sarawak.
PPMGS mega ku iya deka gawa nempa kerejasama antara ‘Oil and Gas Training Services Provider’ dikena ngulihka perengka guna latih enggau awak ngurangka bayar latih.
“Ke diatu kitai benung merambu ngatur pejalai gawa ngambi kaban baru di mengeri besai di selampur Sarawak,” ku iya nengah sebengkah penerang kemari.
Nitih ku Jamal, iya ngarapka mayuh agi pekereja minyak enggau gis di nengeri tu rejista diri nyadi kaban serakup.
Ku Jamal, PPMGS ditumbuh dikena ngintu nasit pekereja kandang tebing tasik kelimpah nyadi serakup ti ngempung semua pengelandik (trade) di dalam sebengkah gerempung.
“tuju penumbuh serakup tu mega belalauka pengiruh bala kaban raban ba pekara gaji enda sebela di sektor minyak enggau gis ngujungka pekereja tebing tasik suah mindah gawa ari siti sarikat ngagai sarikat bukai.
“Ari pemisi serakup tu, sekeda raban mega enda ulih sepeneka ati ngetanka setipikit latih ti udah dibayar pekereja baka ti nyadi diatu kelimpah raban serakup mega bekerejasama enggau raban palan latih mutarka penanggul tu, kelimpah pengaji kaban empu,” nku iya nambah.
Ku iya, raban sida deka nentuka PPMGS meri pemaik enggau awak kereja ngagai kaban di dalam industri minyak enggau gis di Sarawak kelebih agi seriris enggau pengawa numbuhka PETROS lalu mantu sarikat ti gawa di kandang tebing tasik Sarawak ngulihka pekereja landik menua tu.
Berebak enggau nya, PPMGS minta semua pekereja minyak enggau gis di selampur nengeri datai bebala mayuh ngagai Aum Besai Ninting Taun (AGM) ti deka diatur kena 24 Februari tu ila di Hotel Telang Usan Hotel Miri, urung puluk 1.30 lemai.