Ulu Batang Ai ngembuan pengeraja asal ungkup industri dagang temuai
LUBOK ANTU: Kandang menua ulu Batang Ai ba sitak Lubok Antu agi ngembuan pemanah rampa menua ti ngetanka pengeraja asal ke ulih narit ati penatai mayuh temuai ke palan tu enda ngira sekalika ari menua tu tauka menua luar.
Pejalai ngena perau panjai ari palan penyangkai di Tekat Batang Ai nuju ke kandang menua ulu ti ngambi masa sepengelama dua jam lebih ukai semina siti peneleba ke patut diasai semua, tang mega mantaika mayuh kandang menua ke manah ti nyadi kelai ke chukup manah.
Palan ti suah dilawa bala temuai kelebih agi ari menua luar iya nya Nanga Mengkak agi ngembuan pelin rumah panjai lama. Berindik ari nya, peranak rumah panjai nya nerima semua temuai ti datai lalu nyediaka sekeda main asal ti ulih dibantai kelai gaya pengidup bansa Iban. Dikena nambahka penatai pemisi, sida mega bisi ngaga asil pengelandik jari ti ulih dijadika tepa pengingat ngagai temuai ke bisi datai kia.
Nangkan ke nya, pejalai diterus ke ulu agi ti ulih dipeda ba kiba enggau kanan punjung bukit ti bisi diperimba nyadika umai sereta endur betanam getah ti nyadi pun penatai pemisi peranak di kandang menua nya. Taja diau di kandang menua ke semina betengahka jalai ai nyadi penyambung tetiap getnurung pendiau, perintah tetap bisi nyediaka sekula ungkup nembiak ngambi nentuka sida enda tinggal ari sukut pelajar.
Nanga Jambu iya nya kandang endur ti ke penudi ke bisi di ulu Batang Ai, lalu pejalai ke genturung pendiau tu endang siti pengawa ti enchabar ketegal ti ba sekeda endur nya meseti bebatakka perau lebuh ti mudik ngelaban arus sereta ba ai kerangan ti pabu. Taja pia, peranak ba Nanga Jambu ngembuan nasit ke manah berindik ari sida ti bisi mini hidro ke meri sida kuasa elekterik 24 jam lalu enda bebayar. Tu mandangka taja diau di kandang menua ulu, sida enda ngelengkaka awak ke bisi dikena nyapai modenisasyen.