20 iku nerima pemeri ari PEKEMA Sarawak
KUCHING: Yayasan Persatuan Pengimport dan Peniaga Kenderaan Melayu Malaysia (PEKEMA) Pampang Sarawak bisi nyuaka pemeri sepenyampau RM15,000 ngagai urung 20 iku penerima, kemari.
Entara penerima pemeri nya nyangkaum orang nyelai pendiau ( OKU), orang kurang penatai pemisi (OKM), indai tunggal, orang lunggar umur, surau enggau bantu pelajar ngagai nembiak ke nampung pelajar ngagai renggat pelajar tinggi.
Pengawa nyuaka pemeri nya diatur ba premis PEKEMA ditu, ti disuaka Presiden gerempung nya Tan Sri Abang Khalid Abang Marzuki.
Taja pan pemeri nya enda besai tang Abang Khalid ngarapka nya ulih ngelempungka tating belanja ke ditapi bala penerima.
“Kami mayuh nerima peminta bantu sereta pemeri lalu tebal nya ari ruang bilik ke kurang penatai pemisi ti diau di mengeri Kuching enggau Kota Samarahan. Nambahka nya kami mega kala nerima peminta ari Kapit enggau sekeda pelilih menua di menua pesisir.
“Aku ngarapka taja enda mayuh tang ulih ngelempungka tating pengidup ke ditapi peminta,” ku iya.
Nengah penerang berita, taja pan bisi betapi enggau penanggul ekonomi ti enda meruan, tang Abang Khalid madahka Yayasan PEKEMA deka bebendar ngelala sereta semak enggau raban orang ti begunaka bantu sekalika orang sesiku tauka gerempung pengasih.
“Laban tu aja mih chara kami meri pulai baru pemeri ngagai raban bansa ti begunaka enggau ati ti gaga kami deka majakka aktiviti ke baka tu jemah ila,” ku iya.
Ukai semina beratka pengawa dagang, PEKEMA mega bisi juluk deka nyadi sebengkah gerempung ke pemadu mayuh meri pemeri ngagai rayat nengah program Tanggungpengawa Rama Korporat (CSR).
PEKEMA nengah yayasan ke ditumbuh kenyau tujuh taun ke udah, bisi meri pemeri ngagai beribu raban ke begunaka pemeri bekaul enggau ke diguna ninhing hari baka bantu perubat, pelajar enggau sekula, orang seranta, orang ti tasah ngenyit enggau ke bukai.
CSR nya ukai semina mekuh ngagai orang sesiku tang nyengkaum gerempung mega ulih diperundingka sereta enda ngira bida bansa, jalai pengarap enggau penatai.