Semua ti bekaul patut sama begempung nyaup raban ti begunaka bantu
SRI AMAN: Menteri Muda Pengelantang Komuniti Sarawak, Datuk Francis Harden Hollis meransang bala gempung korporat, ejensi perintah, kompeni peribit, Gerempung Ukai Dikuasa Perintah (NGO), kelab tauka orang ngatika diri bela besaup nyuaka pemeri ngagai raban begunaka bantu kelebih agi maya hari besai di menua tu.
Nitih ku iya, endang patut raban tu mansang ke mua nyuaka pemeri ngagai sida ti begunaka iya.
“Ukai semina ejensi perintah aja tau datai nyuaka pemeri maya pengerami hari besai, tang raban bukai mega nadai salah meri bantu ni pengulih diri,” ku iya.
Iya ke mega Kaban Kunsil Nengeri (ADUN) Simanggang mansutka jaku nya lebuh bejaku ba Program Sejambak Kasih beserimbai enggau Taun Baru China ( TBC) diatur Opis Pengintu Pengelantang Mensia Mayuh (JKM) Bagi Menua Sri Aman bepalan di Begunan Gerempung Ngangkatka Pemanah Ulah Che Chuan Khor Simanggang semak ditu.
Berebak enggau nya, iya mega muji pengawa ejensi nya laban udah ngatur program ke bansa nya, nyuaka pemeri.
“Pengawa raban ejensi perintah ke bansa tu patut ditunda raban ari NGO, gempung korporat ke bukai laban bisi insiatif kediri empu ngereja iya.
“Aku ngarap pengudah tu bisi komiti tauka raban bukai bela bisi penyiru ngelempungka tating sida ti deka ngintu pengerami TBC minggu tu,” ku iya.
Sama bisi datai Direktor JKM, Abang Shamshuddin Abang Seruji, Pemesai JKM Sri Aman, Awangku Mohd Najib, Chairman Gerempung Temenggong Kueh Aik Seng, Pemancha Lee Siang Hua sereta bala ketuai raban bansa ke bukai.
Bisi 150 iku raban seranta di Sri Aman nerima pemeri nyerumba TBC taun tu.