Tetiap komuniti patut bebasaka adat bansa bukai ungkup pemaik semua
KAPIT: Pemesai Mangku Pengawa Opis Penyerakup Menua Enggau Intergrasyen Nasional ( JPNIN), Jendri Mangku ngelalau mensia mayuh ngambi bebasaka adat enggau pengawa ti dikemeranka bansa bukai dikena nentuka pengelantang enggau pengelikun.
Kebuah pia ku iya, kitai diau dalam komuniti pupu bansa, datai ari etnik bebida enggau gaya penyelai sentang adat sereta pengawa kediri empu.
“Idup dalam komuniti ke bisi raban etnik bebida, tetiap iku kitai bisi penyelai ba penatai asal enggau jalai idup, adat sereta pengawa ti dikemeran.
“Di Kapit tu aja, kitai bisi 14 etnik. Endang patut endar kitai ngembuan ulah bebatak asur, bebasa kaul enggau pangan diri, bekerejasama, beserakup sereta diau bebaik nentuka pengelantang enggau pengelikun bansa dijaga.
“Siti ari jalai nya ngusung pangan diri maya musim pengerami baka Taun Baru China, Gawai Dayak, Hari Raya enggau ke bukai. Nengah kaul rama kitai ulih meretika pangan diri dikena nempa tanggam kaul enggau pemereti ati dikena nejuka bida ke bisi ti pulaika penyerakup bansa,” ku Jendri.
“Ambika chunto jeman perintah kolonial dalam sejarah, British ngemeranka pengawa ‘pecah dan perintah’ lebuh kitai diperintah sebedau megai perintah kediri empu.
“Ketegal pengawa ‘pecah dan perintah’ tu mih ngujungka mayuh penanggul nyadi, penyarut rama ngagai bala rayat. Runding negatif patut dibuai ke tisi laban perintah kitai deka ngempung semua orang nadai ngira ari ni penatai asal rama sida,” ku Jendri.
JPNIN nyadika pelasar dikena negutka pemanah kaul enggau semua rayat nadai ngira penatai asal enggau jalai pengarap sida, dikena ngerapaska bida ba kaul, kerejasama sereta penyerakup enggau pangan diri.
Siti ari atur ti patut bisi enti Malaysia deka nyingkang mansang iya nya rayat menua tu meseti beserakup lalu kitai ulih ngasaika pengelikun enggau atur ti udah ditetap nentuka perintah ulih nyelinting ngelangkar agenda pemansang pulaika pemaik rayat, ku Jendi Mangku lebuh iya bejadika Pengerami Makai Lemai Taun Baru China Kelab Rukun Tetangga (KRT) Selatan Kapit ti diatur ba sebuah restauran ditu, lemai Hari Dua tu tadi.
Ba lansa ke bukai, Chairman KRT, Ma Tian Ho madahka, sida ti semina Rukun Tetangga China ti majoriti ngatur gempuru nya udah ngangauka KRT bukai ke bisi di Kapit bela datai ngulu.
“Kami ngelaluka penatai semua kitai ke datai ari 28 bengkah KRT di Kapit enggau Song begempuru ditu. Lantang endar ati meda pemanah sukung ari semua kita.
“Aku ngarapka nengah gempuru tu, bala bakih kitai ari bansa Iban, Orang Ulu enggau Melayu deka mereti agi pasal pengerami Taun Baru China.
“Pengawa suah dikemeran musim pengerami, orang besai tuai meri angpau ngagai bala nembiak mit enggau sida ke nembiak bedau belaki bebini, kelai nasit manah enggau pengaya.
“Malam tu kami meri angpau ngagai semua orang ti bedau belaki bebini, indu tauka lelaki,” ku Ma Tian Ho.
Penulung Pemesai JPNIN Kapit Wellesley Johnny, Kaunsilor Michael Laso, bala ketuai opis enggau ketuai komuniti mega bisi datai ngulu gempuru malam nya.
Batang pengerami malam nya pengawa ‘laoseng’ enggau nyuaka angpau ngagai semua sida ti bedau nirika ruang bilik.