Nya nyengkaum nguna media rama dikena ngelaku dagang ngambika sama bela ulih mansang dalam industri, ku Karim
KUCHING: Ejensi sereta kompeni ti bekaul enggau industri dagang temuai meseti nguna chara baru ngambi ulih bela mansang dalam industri.
Menteri Dagang Temuai, Seni, Main Asal, Nembiak Lumba enggau Main Datuk Abdul Karim Rahman Hamzah madah, pekara nya nyengkaum pengawa nguna media rama ba atur ngelaku dagang.
“Media rama mega dikena ngelaku Sarawak enggau Malaysia ba renggat antarabansa,” ku iya maya bejadi Sarawak MATTA Fair 2018 di Palan Bebeli Barang Boulevard di Kuching kemari.
Teks jaku Karim dibacha Menteri Muda Dagang Temuai, Datuk Lee Kim Shin ke datai ngarika iya.
Karim pechaya Sarawak enggau Malaysia deka dikelala di serata dunya nengah inisiatif ngelaku enggau pemansang ti betul.
Iya mega madah, industri dagang temuai ngarika semua peranak Sarawak ke alai industri mandangka pementas kitai ditu nerima temuai ke bisi datai.
“Dagang temuai ukai semina bekaul enggau pengerami besai, tang bela nyengkaum pengerami mit ke ulih matak temuai ari dalam enggau luar datai.
“Penatai temuai deka mai pemisi belanja ngagai hotel, restoran, kompeni perengka pengangkut enggau penyendia servis bukai,” tandu Karim.
Berindik enggau nya ku iya nambah, Opis Menteri Da- gang Temuai Sarawak deka nyukung inisiatif MATTA Fair sereta sedia nempa kerejasama ungkup pemansang industri dagang temuai di Sarawak.
Penyampau 31 bengkah ejensi sereta kompeni ke bekaul enggau dagang temuai ngulu program berengkah 9 nyentuk ngagai 11 Mac.
Ari penyampau nya, 15 ngarika kompeni ‘ Travel Agent’ lalu 16 kompeni penyendia servis.
Bela datai Kaban Komiti Pengatur Pengawa Chris Kon enggau orang bukai.
Media rama mega dikena ngelaku Sarawak enggau Malaysia ba renggat antarabansa. Datuk Abdul Karim Rahman Hamzah Menteri Dagang Temuai, Seni, Main Asal, Nembiak Lumba enggau Main