Penerang dipansutka Dr Sim enda ngelantangka ati taja munyika betundi
KUCHING: Presiden Parti Rakyat Bersatu (UPP) Dato Sri Wong Soon Koh minta Presiden Parti Sa’ati Rayat Sarawak (SUPP) Datuk Dr Sim Kui Hian badu agi ngena jaku kasar nganu pengarang berita, kelimpah ngasuh iya (Dr.Sim) patut beratika ulah diri.
Dr Sim ti mega nyadi Menteri Kaunsil Kandang Menua enggau Pengawa Berumah, bisi mansutka penerang ke enda ngelantangka ati taja pan munyi jaku betundi, nuju siku pengarang berita ari sebuah surat berita ditu, pengudah iya bejadika ‘Ride Hailing App GRAB stand’ di Icom Square, kena Hari Dua tu tadi.
Pengarang berita nya munyi ke nandu tanya (ngagai Dr. Sim) enti SUPP enggau UPP patut begempung bepelasarka jaku lalau Kepala Menteri Datuk Patinggi Abang Johari Tun Openg, ke ngasuh sida iya ngiga jalai begempung.
Dr Sim dipadah nyaut tanya pengarang berita nya, lalu madahka sapa ke enda meretika leka jaku ‘ pulai baru ngagai SUPP’, tau padah ngagai iya (Dr. Sim) ngambika iya ulih nganjung orang nya berubat ngagai sepital pakar sakit untak di Batu 7. Bisi mega dipadahka, Dr. Sim ngasuh bala pengarang berita ke bisi dia nulis utai ke dipadah iya nyengala munyi nya.
Wong ti mega nyadi Menteri Wang Kedua enggau Menteri Pengawa Dagang Entarabansa enggau E-Dagang madahka munyi tu:
“Kami udah macha penerang ke diberi Dr Sim ba surat berita seharitu ( surat berita jaku China), iya nya ngasuh pengarang berita nya betemu enggau pakar sakit untak di sepital Batu 7, lalu iya ( Dr. Sim ukai nyebut UPP). Kami nerima penerang iya tang kami minta Dr. Sim badu agi ngena jaku kasar munyi nya jemah ila, ke tau mai penyarut.
“Utai ke dipadah Dr Sim ke nyebut pakar sakit untak (psychiatrists) enggau leka jaku sepital sakit untak di Batu 7 nya ditulis pengarang berita nya ke madahka leka jaku Dr. Sim nya nuju UPP, lalu tu ke ditabur ba surat berita jaku China, United Daily News’ ke dibacha di serata menua Sarawak.
“Nya kebuah, kami enda tau enda nimbal berita nya. Taja pia, kami nerima penerang ari Dr. Sim ba surat berita seharitu (ensana),” ku Wong.
Di Sibu ensana, UPP mega mansutka jaku penerang nengah Wong, sapit presiden Datuk Dr Jeril Susil enggau mandal presiden kanan, Datuk Tiong Thai King bekaul enggau jaku kasar Dr Sim nya.
Bala pemesai UPP madahka jaku kasar munyi nya, baik nya ke raban politik tauka pengarang berita tau ngerusakka pengawa beserakup, kelebih agi ke pemaik komuniti China.
“Kami enda besetuju mendingka jaku munyi nya ke enda manah dikena kelebih agi lebuh proses begempung nya benung bejalai entara UPP enggau SUPP, nitihka lalau sereta sadang Menteri Besai enggau Kepala Menteri.
“Kededua piak enda tau enda betatika pekara beserakup enggau begempung, lalu anang ngemaruhka pangan diri. Dipelabaka bisi sekeda ke enda lantang ati pasal pengawa begempung tu, lalu jaku ke dipansut ulih Dr. Sim munyi nya nyangka ngagaka ati sida tu.
“Enti bisi pengamat ari sepiak pemesai SUPP deka begempung, kami ngelalau sida iya ketuka pengawa ngena leka jaku munyi nya di media,” ku surat penerang nya.
Utai ke dipadah Dr Sim ke nyebut pakar sakit untak (psychiatrists) enggau leka jaku sepital sakit untak di Batu 7 nya ditulis pengarang berita nya ke madahka leka jaku Dr. Sim nya nuju UPP, lalu tu ke ditabur ba surat berita jaku China, United Daily News’ ke dibacha di serata menua Sarawak. Dato Sri Wong Soon Koh Presiden UPP