Program ‘Bau Gawai Sales 2018’ deka diatur berengkah 28 April nyentuk 6 Mei
KUCHING: Mayuh aktiviti ke ngait ati bisi diatur nyerumba ‘Bau Gawai Sales 2018’ di Medan Dataran Bau di sini, pada 28 April hingga 6 Mei depan.
Kaban Kunsil Nengeri (ADUN) Tasik Biru Dato Henry Harry Jinep madah, entara aktiviti ke bisi diatur nyengkaum muka palan bejual enggau eksibisyen, Panggau Pemerindang WaiFM, Miss Borneo 2018 sereta bejadika bup sejarah enggau komuniti di Bau.
“Temuai dibasa dipela bejadika dua bup tu kena 8 April ila iya nya Menteri Pelajar, Sains enggau Pansik Teknologi Dato Sri Michael Manyin Jawong.
“Kelimpah nya, pengerami tu deka dipenyadika ba Dataran Bau diatur ba palan ke sebaka lalu kitai bisi nganggauka Menteri Muda Kaunsil Kandang Menua Datu Dr Penguang Manggil bejadika pengerami nya,” ku Henry.
“Kena 5 Mei, kitai deka ngatur Pengawa Bejalai Bebala Mayuh Mandangka Main Asal ti disadang ngempuruka urung 3,000 komuniti ari pupu bansa ke bisi di sitak Bau lalu tuju program tu dikena mungkal pengerami Gawai ke deka disambung enda lama udah nya,” ku iya.
Henry madah, pengerami nya deka dipenyadika Sapit Kepala Menteri Datuk Amar Douglas Uggah Embas ke mega Menteri Betanam Betupi Moden, Tanah Adat enggau Pemansang Kandang Menua.
Iya maya dirandau media ba opis iya ditu kemari madah, program bejalai bebala mayuh nya tebuka ngagai sebarang aja orang ke deka datai, tau datai ngagai Opis Pelilih Bau tauka Gerempung Bansa Dayak Bidayuh (DBNA) Pampang Bau enggau Serapi.
“Kitai melabaka lebih 10,000 ngagai 15,000 temuai ari dalam enggau luar sitak tu deka datai ngemataka pengawa bejalai bebala mayuh tu ila,” ku iya.
Ngelansa pasal pengawa ngatur ‘ Bau Gawai Sales 2018’ Henry madah program keterubah iya diatur tu dikena ngerichahka menua Bau enggau mayuh aktiviti sereta dikena nyungkak penatai pemisi peranak di sitak tu.
Kenu ku iya, program semilan hari tu diatur Opis Pelilih Bau, Opis Kaunsil Pelilih Bau, DBNA Cawangan Bau enggau Serapi, gerempung ukai dikuasa perintah enggau bala ketuai raban bansa ari sitak Bau.
Nya alai, iya ngelaluka mensia mayuh ngambi sampal datai sepanjai program ‘Bau Gawai Sales 2018.’