Rohani ngelempaika nasit diri ba chairman BN Sarawak
KUCHING: Penyandang sitak Parlimen Batang Sadong Datuk Seri Rohani Abdul Karim meri pengarap ngagai chairman Barisan Nasional ( BN) Sarawak enggau pusat nentuka sekalika iya agi diasuh bediri tauka enda ba Pengawa Bepilih Besai Ke-14 (PRU14).
Menteri Pemansang Orang Indu, Ruang Bilik enggau Raban Bansa nya madahka tetiap penyandang endang amat ngarapka diri dichalunka baru tang semua nya bepanggai ba pemutus Kepala Menteri Datuk Patinggi Abang Johari Tun Openg ke nyadi chairman BN Sarawak enggau Menteri Besai Datuk Seri Najib Tun Razak ti nyadi chairman BN pusat.
“Nama ti dikearap kami endang baka nya (dichalunka baru), seagi pemutus (nama chalun) bedau dibantaika.
“Tang kitai ke agi nyadi pengari rayat tauka kaban parlimen enda ngira sapa endang meri pengarap ke besai...kitai sama nganti.
“Lalu ba penemu aku enda ngira nama pemutus nya, kepala menteri enggau menteri besai ti nentuka pekara nya,” ku iya lebuh dikerandau pengarang berita Utusan Borneo enggau The Borneo Post.
Ditanya bekaul enggau berita dipelabaka bisi orang ngelakuka diri minta pilih maya PRU14 ba sitak Parlimen Batang Lupar, iya madahka pekara ngelakuka diri endang nyadi tetiap maya pengawa bepilih diatur.
“Pekara tu ngelakuka diri nya ukai baru.
“Tang baka ku aku tadi, kitai ngelempai ngagai ketuai BN di Sarawak iya nya Kepala Menteri ti mega dipelabaka aku bisi berandau tauka berunding enggau chairman BN pusat iya nya Menteri Besai,” ku iya.
Kelimpah ari nya, Rohani madahka mayuh program diatur ninting minggu enggau raban komiti sekalika nengah kapasiti nyadi menteri enggau pengari rayat.
Dikena nyikap diri napi pengawa bepilih ku iya, tetiap ranting enggau pampang deka nemu lalu nentuka dini endur pengundi sereta nama isu ke patut diterang enggau ke bukai.
Lalu entara isu ke suah agi dibantaika sereta bisi penerang ari orang ke bekaul pasal penanggul ke nyadi iya nya, baka isu bekal ai beresi enggau ke bukai.
“Baka pagila (sehari tu) aku begulai enggau Datuk Seri Wan Junaidi Tuanku Jaafar (Menteri Pengeraja Asal enggau Rampa Menua) ke Sebuyau laban din bisi penanggul ban ampuh bah, ai masin tama enggau ke bukai.
“Kitai terus ngereja pengawa ke patut dipejalaika, ukai kitai enda beratka nama utai ke nyadi tang semua nya dipejalaika sereta begunaka timpuh kelebih agi ti begunaka belanja besai.
“Aku suah madahka ngagai bala bakih bekaul enggau sekeda pekara nya patut diputarka opis menteri ke patut,” ku iya
Rohani nyadi pengari rayat ba sitak Parlimen Batang Lupar pengudah ti menang ba pengawa bepilih besai ba taun 2004, 2008, enggau 2013.
Sebedau nya, iya nyadi kaban parlimen Santubong pengudah menang ba pengawa bepilih besai taun 1990, 1994 enggau 1999.