Penyampau tu mandangka pengeransing perintah ngemansangka pekara pelajar ba renggat prasekula
MIRI: Sarawak ngerikod penyampau ‘Taman Bimbingan Kanak- Kanak’ (Tabika) ke dikuasa Opis Pemansang Raban Bansa (KEMAS) pemadu mayuh di Malaysia manggai 1,518 buah lalu ngembuan 20,000 iku nembiak.
Udah nya, ‘Taman Asuhan Kanak-Kana’k (Taska) ba nengeri tu ke dikuasa KEMAS mega ngeirkod penyampau ke pemadu mayuh ba menua tu iya nya 82 buah enggau penyampau nembiak ke diibun iya nya lebih 500 iku.
Direktor KEMAS Nengeri Sarawak Mohd Zamri Mustajap madah, penyampau ke chukup mayuh tu mandangka pengeransing piak perintah dalam ngemansangka pekara pelajar ba renggat prasekula.
“Kitai ulih meda Tabika enggau Taska KEMAS tu bisi ba mayuh endur ukai semina ba mengeri aja, tang mega bisi ba genturung pendiau tauka rumah panjai.
“Nya alai, pengeransing enggau kerejasama ari piak pemansang raban bansa beguna amat dikena nentuka bala anak ba nengeri tu ngasaika pekara pelajar ke menyana,” ku iya rambau Bejadika Pengerami Bengkel Apai Indai Tabika enggau Taska Permata KEMAS Siri 2 di Pustaka Miri kemari.
Iya madah, manggai taun 2020, semua pengajar ke ngajar ba Tabika enggau Taska KEMAS dipinta ngembuan abis nadai Diploma.
“Diatu kitai agi dalam proses nganjung bala pengajar KEMAS nampung pelajar sereta ngulu kus maya kemisi.
“Enti nadai penanggul, manggai taun 2020, nyema penyampau Tabika enggau Taska kitai agi sebaka, nyadi semua pengajar ke dikuasa KEMAS meseti udah ngembuan Diploma,” ku iya.
Kelimpah nya, Mohd Zamri mega madah KEMAS ngagihka urung RM250 ngagai siku nembiak nengah subsidi ungkup barang pemakai enggau ke bukai. Berebak enggau nya, Menteri Muda Dagang Temuai, Seni enggau Main Asal Datuk Lee Kim Shin madah, kerejasama apai indai dalam nempa pelajar tumu anak endang beguna amat laban anak nyadi keresa ke pemadu berega ngagai menua dudi hari.
“Pelajar tumu beguna amat dalam meransang runding enggau pengelandik bala anak.
“Pelajar tumu nyadi pemungkal dikena ngepunka pemujur anak nyapai tikas ke lebih tinggi.
“Aku ngarap apai indai terus meri sukung penuh ngagai sebarang aja pengawa ke diatur KEMAS dalam bidang pelajar tumu tu,” ku iya nengah teks ke dibacha Pemesai Khas iya, Erick Chin.
Bela bisi datai iya nya Pemesai KEMAS Bagi Menua Miri Eric Gray Raymond Jos enggau Menijar Pustaka Miri Salina Zawawi.