SKF seruran bebendar nambahka kualiti servis

SIBU: Yayasan Tungkul Sengayuh Sibu (SKF) seruran bebendar nambahka kualiti servis ungkup bala pesakit.

Chairman SKF Temenggung Datuk Vincent Lau Lee Ming madah, SKF benung ngiga belanja RM1.5 juta nyentuk RM2 juta ninting taun dikena nentuka pemanah servis ngagai penguna.

Ku iya, kenyau ditumbuh ba taun 1993, SKF bisi nyendiaka perubat dialisis enggau rega numbas iya ngagai lebih 100 pesakit ba sitak tenggah ditu.

“Naka tu, kami mega ngembuan 23 unit mesin dialisis dikena merubat 49 pesakit ke udah ngerejista diri lalu dua agi pesakit baru.

“Kami seruran ngiga jalai dikena nambahka pemanah servis, perengka enggau kereban dikena mantu ngubat mayuh agi pesakit,” ku iya.

Iya madah munyi nya rambau Pengerami Ngintu Hari Pesakit SKF nyerumba Hari Tungkul Sengayuh Sedunya ba sebuah restauran ditu, ensana.

Berindi ari nya, Lau meri besai terima kasih ngagai paik ke suah mantu sereta nyukung SKF.

Ngelansa pasal Penyakit Ginjal Kronik ( CKD), iya madah chara pemadu madah ngurangka penyadi penyakit tu iya nya ngeremanka daya idup ti bepengerai.

Iya madah, tu nyengkaum seruran nitihka atur makai ti betul, besenam, landik mutarka runding enggau chara ke betul enggau badu ngirup ai bisa.

“Nadai utai ke lebih berega dalam pengidup kitai kelimpah ari ngembuan pengerai ke manah. Iya ke beguna amat kitai semua patut nyaga perengka dalam tubuh enggau manah,” ku iya.

Bela bisi datai iya nya Menijar SKF Ivy Lau enggau Mandal Chairman Kaunsil Ketuai Amanah SKF enggau Direktor Sepitak Sibu Dr Ngian Hie Ung.