Kerejasama enggau ejensi bukai ngangkatka penyulut TEGAS
KUCHING: Tabung Ekonomi Gagasan Anak Bumiputera Sarawak (TEGAS) nempa kerejasama enggau lima ejensi dikena ngangkatka agi penyulut pengawa ngelakuka inovasyen digital di Sarawak.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka nengah chara nya TEGAS ulih bekunsi pemansut enggau pengelandik.
Kenyau ari taun 2012-2017 TEGAS udah besilih MoU enggau 29 ejensi.
“Enda lama agi (kemari) TEGAS nempa kerejasama enggau lima ejensi dalam bidang data analytics, gaming enggau virtual reality, robotic enggau drone, flying simulation sereta entrepreneurship coaching enggau mentoring.
“Semua tu dipejalaika dikena ngangkatka penyulut TEGAS ke nyadi indu platform ba pengawa ngelakuka inovasyen digital (iya nya STEM, TVET enggau inovasyen orang dagang) ba Sarawak.
“Nengah kaban strategik, TEGAS ukai semina ulih bekunsi pemansut enggau pengelandik, tang kerejasama tu ngangkatka penyikar enggau pengasi TEGAS,” ku iya.
Len ke nyadi Chairman TEGAS mantaika pekara nya dalam jaku pengelalu pengerami bejadika Sarawak Career & Training Fair (SCaT Fair) 2018 ke diatur TEGAS begulai enggau Opis Menteri Pelajar, Sains enggau Pansik Teknologi ba BCCK ditu, kemari.
SCaT Fair 2018 ti berambai jaku ‘Be A Changemaker’ udah mujur dipenyadika Kepala Menteri Datuk Patinggi Abang Johari Tun Openg.
TEGAS betukar sempekat pemereti ati (MoU) sereta berengkah nempa kerejasama enggau Azendian Solution Sdn Bhd; Chumbaka Sdn Bhd; EFFEX Co. Sdn Bhd; PETROSAR Academy Sdn Bhd enggau Satu Creative Services Sdn Bhd.
Kerejasama nengah MoU nya sebengkah inisiatif nempa pengelandik dikena ngemansangka ekonomi digital Sarawak, ngelakuka kreativiti enggau inovasyen ngagai raban biak Sarawak enggau ke bukai.
Lebuh ke ngenang pasal SCaT nya, Len ngarapka mensia mayuh terus meri sukung ari raban bansa kelebih agi ngagai raban nembiak nengeri tu.
SCaT Fair 2018 dipasuk 70 institusyen pelajar enggau latih, 60 kompeni ti nyendiaka 5,526 peluang gawa, 9 ejensi nyendiaka bantu belanja dikena nampung pelajar kelimpah ari bisi 17 licha pasal peluang pelajar enggau pengawa sereta bisi diatur STEM Playground, Hackweekend enggau The Big Chef.
“Enggau gaga ati aku madah pengudah abis timpuh seminggu program tu, TEGAS enggau 45 institusyen pelajar deka ngatur ‘Project of Dreams Realised’, iya nya tujah pejalai pelajar ke pemadu besai.
“Program tu deka berengkah ari Lundu ngagai Lawas ngambika raban biak enggau nembiak di menua pesisir sama ulih ngasaika peluang ti nyauka sama enggau nembiak di mengeri,” ku iya seraya madahka SCaT Fair 2019 diperambu deka diatur 11 Mac.
Sama bisi datai ba pengerami nya kemari Menteri Wang Kedua Dato Sri Wong Soon Koh; Menteri Muda Sains enggau Pansik Teknologi Dr Anuuar Rapaee; Menteri Muda ba Opis Kepala Menteri (Hal Ehwal Korporat) Abdullah Saidol; Sapit Sekretari Perintah Nengeri ( Transformasyen Sosioekonomi) Datu Mohamad Abu Bakar Marzuki enggau Sekretari Mendam Opis Menteri Pelajar, Sains enggau Pansik Teknologi Datu Sudarsono Osman enggau ke bukai.