Padah pekara ke amat sentang kuing menua ngagai rayat: Abang Johari
KUCHING: Semua raban pengawa bepilih kelebih agi Parti Pesaka Bumiputera Bersatu (PBB) patut betemu enggau rayat lalu nerangka pasal pekara ke amat sentang kuing iring menua tu ngagai rayat Sarawak maya Pengawa Bepilih Besai Ke-14 (PRU 14).
Presiden PBB ti mega Kepala Menteri Datuk Patinggi Abang Johari Tun Openg madah, iya enda ngenggaika ke alai hari bulan PRU majak semak dalam timpuh sebulan dua ti begunaka semua kaban parti patut sedia enda ngira maya.
“Enda lama agi ‘ tawak’ deka dipalu lalu ngagai kaban parlimen kitai, kitai ngarapka menang besai sereta menang magang ba sitak PBB ba pengawa bepilih ke sekali tu.
“Di Sarawak ba pengawa bepilih ke sekali tu, kitai ngambi kira bantu ke diberi Menteri Besai Datuk Seri Najib Tun Razak diband- ingka enggau bantu ke diberi Tun Dr Mahathir Mohamad semanjai 22 taun iya nyadi Menteri Besai,” ku iya.
Iya mansutka pekara nya lebuh bejaku ‘Majlis Penghargaan Sekalung Budi Sejambak Kasih’ nyerumba Gempuru Besai PBB Ke-14 ti digulu Sapit Presiden PBB ti mega Chairman Komiti Gempuru Besai PBB Ke-14, Datuk Amar Douglas Uggah Embas ditu, malam Hari Satu tu tadi.
Bejaku baru, Abang Johari madahka raban pengawa bepilih parti patut madahka pekara ti amat ngagai rayat sereta patut ngaga ‘homework’ dulu.
“Kitai patut nerangka nama utai ke nyadi maya iring iya (Tun Mahathir) 22 taun... patut dikeingatka enti sida tu datai nama utai ke nyadi.
“Nya alai kitai ba PBB patut nyaga hak kitai, kitai bisi kuing ti patut diputuska rayat Sarawak, ukai orang bukai sereta dalam pekara tu kitai patut bekerejasama,” ku iya.
Dibandingka enggau Menteri Besai diatu ku iya, Najib nadai leman sereta liberal pasal berundingka hak Sarawak lalu iya meri jamin deka meri pulai baru hak Sarawak ti sekalika enda tauka sengaja kena ambi ari nengeri tu.
Ukai nya aja ku iya, pengudah tiga bulan keterubah nyadi Kepala Menteri, Najib nadai leman enggau peminta nengeri tu lalu meri pulai baru Tekad Ai Hidroelektrik Bakun ngagai Sarawak.
“Bebida enggau Tun Mahathir, enti maya nya suba kitai bejakuka pasal hak Sarawak aku pechaya kitai ditan ari baruh Akta Pengelikun Dalam Negeri (ISA) lalu nya alai nadai siku pan berani bejaku lalu pengujung iya minyak enggau gis kitai enda ulih diambi laban nangika ISA,” ku iya.
Abang Johari terus ngingatka rayat nengeri tu pasal manisfesto Pakatan Harapan ti desenteralisasi ke dipelabaka tau ngujungka ‘pisang bebuah dua kali’.
“Maya iring iya empu (Tun Mahthir) deka ngambi Sesco tang laban ketuai ngiring kitai maya nya landik sereta pandai nya alai enda nyadi. Pia mega pasal polisi institusyen wang ari baruh iring iya, ke alai bank ke diempu Sarawak baka Bank Utama, Hock Hua Bank senggau Kwong Lee Bank ‘ditelan’ pia aja pengudah institusyen bank begempung maya nya,” ku iya.
Iya madah, nya mandangka iPH enda ulih bejalaika desentralisasi ti endang udang nyata enda ulih nyadi agi.
Ba pengerami ke sama Abang Johari madahka iya deka mantaika dua agi pekara ti meri penguntung ngagai Sarawak ba bulan September enggau Oktober taun tu, ke alai kededua pekara nya meri pengering ngagai Sarawak nitihka chuan konstitusyen diri empu.
“Bulan September ila nya bekaul enggau nembiak kita ke bisi kreativiti enggau peluang sida mantaika pengelandik lalu bulan ba Oktober bekaul enggau belanja nengeri ba pengawa ngemansangka mengeri enggau menua pesisir,” ku iya.
Sama bisi datai, dua iku Mandal Presiden Kanan PBB, Datuk Seri Fadillah Yusof enggau Dato Sri Michael Manyin Jawong, Sekretari Besai PBB Datuk Alexander Nanta Linggi, Datuk Patinggi Tan Sri ALfred Jabu Numpang ti kala nyadi Sapit Presiden, Ketuai Raban Orang Indu PBB, Dato Sri Fatimah Abdullah enggau Chairman Mendam PBB, Datuk Amar Mohd Asfia Awang Nassar.