Ketegal nya SPR nengah Akademi SPR regas nerenak pemereti runding ba rayat sentang proses pengawa bepilih di Malaysia

KUCHING: Komiti Pengawa Bepilih(SPR) napi runding negatif rayat tetiap maya pengawa bepilih diatur.

Perkara nya dipansutka Penulung Direktor Pengawa Bepilih Amar Soufwan Morazuki rambau licha pengawa bepilih ke diatur SPR Sarawak di Auditorium P.Ramlee RTM ditu, kemari.

Berindik enggau nya ku iya, SPR nengah Akademi SPR regas bejalaika pengawa nerenak pemereti ba rayat Malaysia nyengkaum pengarang berita sentang proses pengawa bepilih di Malaysia.

Ku iya, entara runding ke suah dikembuan rayat iya nya SPR ngeringka parti Barisan Nasional (BN) tetiap maya pengawa bepilih.

Nambahka nya ku iya, bisi orang udah ngumbai Pengawa Bepilih Besai Ke14(PRU14) deka nyadi pengawa bepilih ke enda lurus ba sejarah Malaysia tajapan bedau diatur.

“Kami ba SPR, munsuh kami ukai parti politik laban kami ngenahka parti politik sama bela.

“Munsuh kami di SPR iya nya runding rayat nuju SPR,’ku iya.

Iya madah tetiap parti politik ngembuan strategi kediri lalu nyadi tanggungpengawa SPR nerang sereta ngemetul tuduh nya.

Amar madah, ba PRU ke-13 (2013) SPR nerima 65 petisyen lalu nyauka setengah ari penyampau nya dikenataika BN.

“Reti nya BN pan enda tepantup ati enggau proses sereta pemutus pengawa bepilih. Orang suah nuduh SPR ngeringka BN, tang runding nya enda amat.

“Enti amat, nama kebuah BN ngenataika petisyen ke alai penyampau nya setengah ari 65 ke diterima,’ ku iya.

Iya nambah, ari 65 petisyen ke diterima, nadai seiti ke bekait enggau isu ke suah dikenatai ba media rama baka ke peti undi diganti tauka keretas undi ditambah ninting kali bisi penusah bekal lektrik putus.

“Enda patut ejen pengundi ti ngarika chalun dekaka pekara nya nyadi laban sida seruran dia maya proses ngundi diatur.

“Nambahka nya enti ‘black out’ bisi nyadi, enda mih lalu petang laban proses ngira undi berengkah jam 5.30 lemai lalu begunaka timpuh enda kurang sejam setengah tembu, di Semenanjung jam 7 lemai agi terang.

“Reti nya pekara nya enda nyadi, semina digaga ngambi ulih ngenusutka runding rayat,’ku iya.

Iya madah maya proses muai undi SPR ngena prosedur operasyen standard(SOP), entara chara iya nya ‘urut jari’ ngambi enda mudah dikemula.

Ku iya, pengudah tembu proses muai undi lalu palan ngundi ditutup jam 5 lemai, keretas undi deka dikira ba mua ejen pengundi.

“Enti bisi bantah, keretas undi deka diengkah ba dulang ke ditulis ‘ragu’ ti deka dipeda baru pengudah proses ngira undi tembu.

“Enti bisi jaku baka ‘ calon ini penipu’ ba nama chalun ke dichunting, keretas undi nya enda diterima,’ ku iya.

Munsuh kami di SPR iya nya runding rayat nuju SPR. Amar Soufwan Morazuki Penulung Direktor Pengawa Bepilih