Raban pengawa bepilih BN deka dilanchar kena ujung bulan tu
KUCHING: Bagi Nembiak Barisan Nasional(BN) Nengeri deka ngelanchar raban pengawa bepilih ujung bulan tu ngambi ulih nyikap gempung nya napi Pengawa Bepilih Besai Ke-14(PRU 14).
Ketuai Bagi nya, Gerald Rentap Jabu madah raban pengawa bepilih deka dilanchar Kepala Menteri Datuk Patinggi Abang Johari Tun Openg.
Kelimpah ari nya, Gerald ke mega Ketuai Bagi Nembiak Parti Pesaka Bumiputera Bersatu (PBB) nambah, sida deka chakah agi nguna media rama ba pengawa bekimpin PRU14.
“Media rama deka mantu bagi nembiak ngenyemakka pengundi biak lalu nentuka BN menang nengah majoriti ke besai.
“Kelimpah nguna media rama, kitai mega deka mantu ngerembaika polisi perintah enggau nerangka program ubah ke dituku kepala menteri sereta negika hak Sarawak,’ku iya lebuh dikerandau bedau lama tu tadi.
Iya ke mega Kaban Kunsil Nengeri(ADUN) Layar madah deka nyaup pengawa bekimpin nyengkaum kimpin ke bisi diatur ba kandang mengeri.
Ku iya, bagi nembiak deka nyaup kimpin ba semua penuduk BN ke alai pengawa bepilih serak tu deka nyadi platfom endur peranak Sarawak mandangka sukung ngagai kepala menteri.
“Kepala menteri udah ngereja mayuh pengawa ngambi ulih nentu Sarawak teulihka hak ke patut.
“Reti nya kitai meseti chakah agi ngereja pengawa ngambi tau nentu BN menang mayuh agi penuduk,’ku iya.
Rentap pechaya pengundi biak megai kuasa ke besai ba atur nentuka pemutus PRU 14 laban sida nemu pekara ke nyadi, bepelajar sereta bepenau ba teknologi enti dibandingka enggau apai indai sida.
Ngenang kaul ke sama, Bagi Nembiak BN Negeri ku Rentap tegap bediri di belakang kepala menteri lalu nyukung insiatif iya ba sentang ekonomi digital ti dikearap deka mai pemaik ngagai semua peranak Sarawak jemah ila.
“Ekonomi digital deka meri pengarap baru ngagai raban nembiak lalu meransang sida kreatif agi sereta inovatif.
“Pemujur besai di Sarawak deka ngenataika siti pesan berat ungkup kaling kitai di Semenanjung Malaysia,”ku Rentap.