Entara inisiatif ke dipejalai tu nyengkaum GERAH, Kimpin 3J, Sahabat GERAH SPRM enggau Sahabat Cilik SPRM
KUCHING: Mayuh bengkah inisiatif ke diatur Komiti Penagang Penyalah Makai Suap Malaysia ( SPRM) dikena ngemunas penyalah makai suap di nengeri tu deka terus dipajak.
Nitihka penerang Direktor SPRM Sarawak KPKPj Razim Mohd Noor, entara inisiatif iya nya Gerakan Revolusi Anti Rasuah (GERAH), Kimpin 3J ( Jangan Hulur, Jangan Kawtim enggau Jangan Settle), Sahabat GERAH SPRM enggau Sahabat Cilik SPRM.
“GERAH, Kimpin 3J, Sahabat GERAH SPRM enggau Sahabat Cilik SPRM diatur begulai lalu diatur di serata menua ninting bulan.
“Program bansa tu ngemu- ntang SPRM ngenamping rayat lalu nanggam kerejasama ba atur ngemunas penyalah makai suap,”ku iya.
Razim mansutka jaku nya nengah teks ke dibacha Sapit Direktor SPRM Sarawak PKP Zulhairy Zaidel ba Program ‘ Bacaan Ikrar Bebas Rasuah’ Opis Penyerakup Menua enggau Integrasi Nasional( JPNIN) Pelilih Kuching enggau Serian.
Program ke digulu Sapit Direktor JPNIN Esther Dingkawan nya diatur di Ringkat 17, Begunan Sultan Iskandar ditu, kemari.
Razim nambah, nengah Kimpin 3J iya nya Jangan Hulur, Jangan Kawtim enggau Jangan Settle, SPRM deka ngenataika pesan ngambika rayat mereti lalu enda ngaul diri ba ulah makai suap.
Ku iya, pesan nya mega mungkur nyeliah diri ari besalahguna kuasa nengah ulah nerima tauka meri suap.
“SPRM mega meransang mensia mayuh ngerijista diri ba Sahabat GERAH SPRM.
“Sida deka nyadi mata enggau pending SPRM, ngeriput ulah makai suap ke bisi nyadi,’ku iya.
Naka ke diatu ku Razim, penyampau 200,000 iku orang udah ngerijista diri dalam Sahabat Gerah SPRM di serata menua.
“Di Sarawak, urung 12,000 iku udah ngerijista diri ba Sahabat GERAH SPRM lalu entara nengeri ke udah ngerijista kaban ke pemadu mayuh,’tandu Razim.
Penyampau 115 iku staf JPNIN ari Pelilih Kuching enggau Serian ti ngarika bala pemesai, pengajar enggau pemantu pengajar tabika penyerakup datai macha ikrar.
Bela datai Pemesai Penyerakup JPNIN Pelilih Kuching enggau Serian iya nya Abdul Rasid Masin enggau Hartini Mohd Kassim.
Program bansa tu ngemuntang SPRM ngenamping rayat lalu nanggam kerejasama ba atur ngemunas penyalah makai suap. KPKPj Razim Mohd Noor Direktor SPRM Sarawak