Kimpin ‘Gempur’ mujur dilanchar raban SPRM

KUCHING: Kimpin ngemunas orang meri suap tauka ‘ Gempur’ udah dilanchar Komiti Penagang Penyalah Makai Suap Malaysia (SPRM) bedau lama tu tadi.

Direktor SPRM Sarawak KPKPj Razim Mohd Noor madah ‘ Gempur’ nagit 3 bengkah raban iya nya orang gawa perintah ke bisi kaul enggau pengawa neritka adat, sida ke ngumpul bayar sereta sida ti ngeluarka lisin.

“Tu nyemaka kimpin ‘Perangi Pemberi Rasuah’ ke dipungkal ba taun 2010 tang diatu udah diberi nama baru iya nya ‘Gempur’.

“Gempur sebagi ari inisiatif SPRM nengah program Gerakan Revolusi Anti Rasuah(GERAH),’ku iya.

Razim mansutka jaku nya nengah teks ke dibacha Sapit Direktor SPRM Sarawak PKP Zulhairy Zaidel ba Program ‘Bacaan Ikrar Bebas Rasuah’ Opis Penyerakup Menua enggau Integrasi Nasional( JPNIN) Pelilih Kuching enggau Serian ditu, kemari.

Iya nambah nengah slogan ‘ Anda Hulur, Kami Lapor’ tuju kimpin iya nya nerenak pemereti ba orang gawa perintah ngambika enda nerima sebarang aja pemeri.

Enti dikalih ngagai bahasa melayu Sarawak, slogan kitai iya nya ‘Kitak Merik, Kamek Repot’, tandu Razim.

Nitihka penerang Razim, ‘ Gempur’ bekait enggau Kimpin 3J iya nya Jangan Hulur, Jangan Kawtim enggau Jangan Settle.

“Meseti dikeingat, ‘Gempur’ ukai kimpin timpuh pandak tang deka terus dipejalai ungkup timpuh ke panjai,’ku iya.