Kerejasama rat entara raban PIBG enggau sekula ulih nentuka penyulut sekula nyapai juluk ti ditagit
SRI AMAN: Menteri Muda Pengelantang Komuniti Sarawak, Datuk Francis Harden madahka Serakup Apai Indai Enggau Pengajar (PIBG) sebuah gerempung ti chukup besai tuju sereta beguna endar ba pemansang sekula.
Nitih ku iya, enda ulih dikeenggaika tanggungpengawa PIBG di sekula ulih ngangkatka pemansang enggau tikas penyulut sekula laban PIBG nyadi penyambung tunga kuing sekula nuju penyulut pelajar, lalu pengawa PIBG ti nyulut deka nempa sekula ti pegari nama.
“Nya kebuah aku meransang kitai bela gawa sereta meri penemu ngemansangka PIBG ngambi pulaika penyulut pelajar bala anak kitai. Pekara penyerakup bala kaban endang beguna endar ngambika gerempung ulih ngempung orang gawa, buah runding ti ngemegah.
“Penyulut gerempung tauka serakup endang bepenggai ba beberapa pekara ti patut dikereja begulai enggau nitihka atur,” ku iya.
Iya ke mega Kaban Kunsil Nengeri (ADUN) Simanggang mansutka jaku nya lebuh bejaku ba Program Merarau Nyerumba Ngintu Taun Baru China diatur begulai Kunsil Ngatur Pengawa Sekula, Sekula Primari Bansa China (SJK) Cina, Chung Hua, Lingga, Parti Sa’ati Rayat Sarawak (SUPP) Pampang Lingga enggau Komiti Pemansang enggau Pengelikun Genturung Pendiau (JKKK) Pasar Lingga bepalan di Balai Komuniti Lingga semak ditu.
Ku iya, juluk dalam pelajar endang ngemeratka penemu enggau pengidup dudi hari. Nya kebuah, dikena nyapai juluk enggau tuju pelajar ti dikedeka kitai nya, siti
Nya kebuah aku meransang kitai bela gawa sereta meri penemu ngemansangka PIBG ngambi pulaika penyulut pelajar bala anak kitai. Pekara penyerakup bala kaban endang beguna endar ngambika gerempung ulih ngempung orang gawa, buah runding ti ngemegah. Datuk Francis Harden Menteri Muda Pengelantang Komuniti Sarawak
strategi ti tau dipejalai iya nya ngerapitka kaul sekula enggau apai indai nengah PIBG.
“Ngembuan tanggungpengawa enggau pemanah kaul antara apai indai, pengajar enggau komuniti di menua nya patut dikaul sereta tegap. Kaul enggau kerejasama tu deka nempa pemereti ati ti bela begunaka pangan diri nempa penyulut sekula,” ku iya nandu nyemetak.
Kelimpah ari nya, PIBG mega ulih nyadi peransang ba kaul rat enggau opis perintah sereta Gerempung Ukai Dikuasa Perintah (NGO) dikena nempa pemereti ati enggau pengawa bekunsi pintar pulaika pemaik begulai.
“Penanggul rama kemaya hari balat ngirauka kitai semua. Ulah rama enggau enda menuku ti ngaul raban nembiak enggau nembiak sekula ngasuh kitai balat irau. Mayuh pun pekara ti ngasuh penanggul tu nyadi. Kitai enda patut nyalahka pangan diri.
“Nya kebuah, penanggul bansa nya patut diperati semua raban. Sentang pekara tu tanggungpengawa PIBG begulai enggau raban ngatur pengawa sekula. Pelajar moral enggau nerenakka pemanah ulah, bisi ati kasih enggau penetap diri sereta modal mensia patut diiri ngagai bala anak ngambika ulah enda menuku tu ulih ditagang tumu,” ku iya nerang silik.
Nya alai ku iya, PIBG di sekula patut sama chakah gawa enggau ngeripih pengawa ngambi ulih nempa pengawa ti meruan agi ba pemujur ti dikearap.
“Penemu enggau kereja ti nyulut patut diterenak ngambika PIBG meruan relevan sereta gawaka penyulut pelajar bala anak,” ku iya nandu.
Sama bisi datai Temenggong Kueh Aik Seng, Penghulu Tiong Choon Onn, Kunsilor Waterkiller James Junit, kepala pengajar sereta kaban Kaunsil Pengatur Pengawa Sekula ke bukai.
Berebak enggau program nya, Harden mega bisi nyuaka geran penyampau RM3,000 ngagai Benevolent Society Lingga seraya JKKK Pasar Lingga mega nerima RM5,000, Kaunsil Pengatur Pengawa Sekula Chung Hua Lingga bela nerima belanja penyampau RM10,000, JKKK enggau Biro Indu Rumah Kasa, Kampung Empelanjau bela nerima RM5,000 enggau RM3,000.