SPRM deka numbuhka Tim Pengereja Pengawa matau maya PRU14
KUCHING: Komiti Nagang Makai Suap Malaysia (SPRM) numbuhka Tim Pengereja Pengawa ti deka bejalaika pengawa matau sekumbang Pengawa Bepilih Besai Ke-14 (PRU 14) diatur.
Sapit Komisioner (Operasyen) SPRM, Datuk Seri Azam Baki madah, tim pengereja pengawa nya deka bejalaika pengawa matau berengkah ari parlimen direrak nyetuk ke tembu pengawa bepilih.
Iya mega madahka SRPM bisi nempa kerejasama enggau Komiti Pengawa Bepilih (SPR) sereta Polis Diraja Malaysia (PDRM) nengah tim pengereja pengawa nya.
“Ba pengawa bepilih ke sekali tu, SPRM deka numbuhka raban pengereja pengawa ti deka matau pengawa bepilih.
“Pengawa matau nya deka dipejalaika maya kimpin ke alai kami deka matau isu ke dibantaika enda ngira bagi sepiak ni ti bisi mantaika isu makai suap enggau salah nguna kuasa ke ulih ditinggang ukum ari baruh Akta SPRM 1954.
“Kerejasama nya mega deka diatur begulai entara SPRM enggau Komiti Pengawa Bepilih sereta megaengka enggau polis,” ku iya lebuh ke nyaut tanya ari pengarang berita bekaul enggau penyikap SPRM napi PRU 14.
Dulu ari nya Azam ngulu sereta ngemataka Majlis Serah Tugas Pengarah SPRM Sarawak ke baru ti diatur ba Bilik Mesyuarat Utama Kompleks Bangunan SPRM ditu, apin lama udah.
“Baka ke suah diatur ngelama tu, lebuh timpuh pengawa bepilih dipadahka tauka par- limen direrak, tiga ejensi tu deka beserakup dalm siti tim pengereja pengawa ke deka beratika isu ti dibantaika maya pengawa bepilih.
“Laban ukai semina SPRM aja ke matau maya pengawa bepilih tang nyengkaum ejensi bukai kelebih agi polis enggau komiti pengawa bepilih,” ku iya ti udah mayuh peneleba bejalaika pengawa maya pengawa bepilih.
Lebuh dipinta ngenang pekara bukai, iya nya bekaul enggau isu kaban politik sekalika ari Barisan Nasional enggau penyakal ke bisi ditasat SPRM, iya madahka statistik nya bisi dibantaika menteri maya aum parlimen ke benung diatur diatu.
Iya ti enggai ngenang silik pasal isu nya madah, sekeda ari sida nya benung ditasat SPRM.