Lai pemadu nyulut SPM di Sarawak, iya ngemegah SMK Methodist, Sibu
SIBU: Angel Lai An Ge udah ngaga rayat Sibu berasai temegah ati kelebih agi Sekula Sekondari (SMK) Methodist pengudah iya nyadi nembiak ke pengabis nyulut di nengeri tu, dalam pemutus peresa Sijil Pelajaran Malaysia ( SPM) 2017 ti dipansutka ensana.
Lai nyadi nembiak sekula tunggal ke ngerikod pemujur japai 12A+ nitihka penyampau sabjek ke diambi iya.
Ke pengabis iya ngagaka ati Lai, pemujur iya disempulang ulih empat iku nembiak SMK Methodist bukai ke bulih 11A+.
Sida ke nyapai pemujur nya, Chong Min Hui, Cheong Kang Min, Cindy Ho Mei Jin enggau Delphina Tiong Ming Min.
Lai lebuh dirandau madahka diri sigi enda ngadang bulih pemutus SPM ke manah bansa nya.
“Aku udah ngaga enggau naka iya pemanah, lalu ba aku, pekara tu ngemuaska ati aku teulihka pemujur tu,” ku iya madah lebuh dikerandau ulih pengarang berita kemari.
Ku Lai, iya mega bulih A dalam semua sabjek ba sesi penguji ti digaga sebedau peresa ke endar digaga.
Taja pia, iya madahka iya tetap betatika sabjek baka Jaku English enggau Sejarah.
Kelimpah ari nya, Lao madahka iya bisi pengirau mimit enggau sabjek Jaku China, laban beratika sabjek nya ke pengabis tusah digaga.
“Indai aku pengajar ba Sekolah Jenis Kebangsaan Cina (SJK(C)...iya ke ngasuh aku ngambi sabjek nya dalam SPM,” ku iya.
Taja pia, naka kediatu, iya bedau milih ni bagi palan pelajar ke deka alai iya nyambung pelajar iya udah tu ila.
Ku iya, dipelabaka iya deka ngambi kus Akaun tauka pekara bekait enggau pengawa Dagang enti bisi universiti ke deka meri iya peluang nya.