KEMAS Sri Aman chakah ngatur program komuniti
SRI AMAN: Urung 80 raban Komiti Pemansang enggau Pengelikun Genturung Pendiau, penyereta pengawa Program Opis Pemansang Komuniti ( KEMAS) Sri Aman sereta komuniti di genturung pendiau sitak Po ai, Melugu bisi enggau ngulu ‘Bengkel Keluarga Sejahtera’ ti diatur ulih KEMAS Pelilih Menua Sri Aman di Rumah Jumat Enggat, Po Ai, Melugu, semak Sri Aman pagi kemari.
Pemesai Pekara Pelajar Pengelandik (PKEM), Opis KEMAS Pelilih Menua Sri Aman, Rosani Ham ti mega nyadi Pengatur Program nya madahka, entara pemerat ngaga bengkel nya laban deka meri peluang ngagai raban ke diselinting belajar pekara ke bisi bekait enggau pengelantang pendiau ruang bilik.
Kelimpah ari nya ku iya, pemerat bukai laban deka negapka penemu modal mensia raban ke ditagit, enggau penemu dalam pekara bekait enggau pengerai, pelajar enggau ekonomi.
Rosnani nandu baru madahka program tu siri ketiga ti digaga ulih KEMAS Pelilih Menua Sri Aman, alai ke pemungkal (Siri 1) udah digaga di Palan Internet 1 Malaysia, Melugu lalu kedua di Tabika KEMAS Siga.
Ku iya, urung tiga bengkah licha udah dibantaika nengah program tu, iya nya licha bekait enggau chara madah rumah angus ke dibantaika ulih Pegawai Bomba ari Opis Bomba enggau Penyah penusah Pelilih Menua Sri Aman, Freddy John lalu licha ‘ Online Grooming’ digaga ulih Menijer Palan Internet 1Malaysia Melugu, Stella Tarang enggai licha Ngaga JKKK nyadi Palan ke Mujur digaga ulih Pembantu Pemansang KEMAS Pelilih Menua Sri Aman ti mega nyadi orang ke betanggungjawab dalam pekara Pemansang Komuniti Sri Aman, Kelvin Lambai.
Sama bisi enggau ngulu bengkel nya, bala tuai rumah ari genturung pendiau Engkeramut, Melugu enggau Nyelam.