LTAK dipilih alai mandangka Adat Pesaka Malaysia 2018

KUCHING: Opis Seni enggau Adat Pesaka Nasional ( JKKN) Sarawak taun tu udah milih Padang Bilun Entarabansa Kuching (LTAK) alai endur mandangka Adat Pesaka Malaysia.

Direktor Menua JKKN Abdul Mutalib Abdul Rahman madah pengawa mandangka adat pesaka Malaysia di LTAK, siti atur pengawa ke deka mantaika ajat tradisional Malaysia, muzik, sereta seni adat pesaka ke ulih dipeda temuai menua tu tauka ari menua luar, ke nyadi siti peneleba ke nyelai ba Malaysia ke ngembuan mayuh macham diversiti, kelebih agi di Sarawak.

“Pengawa pemandang nya, nyadi pemerat program JKKN ba tiap bengkah sitak menua, ke deka digaga tiap ujung minggu ninting bulan sepemanjai taun tu di LTAK.

“Tang ke batang, pengawa pemandang nya ulih matak sereta ngelaluka temuai ba pintu penama ngagai Sarawak,” ku iya madah ba aum pengarang berita pengudah bechairmanka aum bejadika Pengawa pemandang Adat Pesaka JKKN Sarawak ke ngena jaku rambai ‘The Colours of Sarawak 2018’ di opis sida iya di Bangunan Sultan Iskandar, Jalai Simpang Tiga ditu, ensana.

Pengawa pemandang nya mega ku iya, tau nyadi palan ngangkatka pemanah seni enggau adat pesaka Malaysia enggau Sarawak, nyengkaum mayuh macham pengawa dagang temuai ke ulih digaga tauka dipeda di menua tu.

“Ba taun siti nyin tadi, pengawa ke sebaka tu, digaga begulai enggau Taman Budaya Sarawak (SCV) di Damai Central. Kami mega kala ngaga kerejasama enggau Opis Pengatur Kuching Waterfront.

“Ke taun tu, kami deka neritka agi kaul kami enggau mensia mayuh sereta temuai, meri peluang tu ngambika sida iya pan ngasaika diri semak enggau komuniti menua tu,” ku iya.

Menteri Pengawa Dagang Temuai, Seni, Adat Pesaka, Nembiak, Lumba engga Main Datuk Abdul Karim Rahman Hamzah deka ngepunka Pengawa pemansang Adat Pesaka tu kena 25 March tu ila di LTAK.