Enam buah klinik ngeli deka digaga di menua pesisir
KUCHING: Sarawak benung nuju pengawa numbuhka enam buah agi klinik ngeli ti deka dikemansangka ba kandang menua pesisir nengeri tu nengah Langgur Pemansang Malaysia Lumpar Ke- 11 (RMK11).
Kepala Menteri Abang Johari Tun Openg madahka, nya dikena Opis Pengerai Nengeri Sarawak ngangkatka agi pemanah pengawa nyaga pengerai mulut kelebih agi ungkup mensia mayuh di menua pesisir.
“Opis tu diatu benung nuju pengawa deka ngemansangka enam agi klinik ngeli ba menua pesisir Sarawak ari baruh RMK- Ke-11.
“Klinik tu deka ulih ngangkatka agi aksesbiliti pengawa nyaga pengerai mulut mensia mayuh di Asajaya, Kabong, Pusa, Jepak, Sungai Asap enggau Brang Bayur,” ku iya.
Abang Johari madahka pekara nya lebuh bejadi ‘8th Borneo Dental Congress & Trade Exhibation cum 9th Malaysian Dental Associa- tion Eastern Zone (MDAEZ) Annual General Meeting’ ke diatur MDAEZ ba sebuah hotel ditu, kemari.
Berebak enggau tu iya muji pemendar Opis Pengerai Nengeri tu ke bebendar deka ngangkatka pemanah pengawa nyaga pengerai mulut rayat nengah atur numbuhka mayuh klinik ngeli di Sarawak baka bisi ditumbuhka ba Klinik Pengerai Petra Jaya sereta ba Palan Transformasyen Mengeri ( UTC) Kuching, Sibu enggau Miri di taun 2016.
Nambahka nya, klinik ngeli di Bau ke dipejalaika ari baruh RMK Ke-10 udah berengkah dikena ba taun 2016 sereta di Sibu Jaya ti berengkah beoperasyen ba taun 2016.
Klinik nya mega bisi ba Palan Transformasyen Menua Pesisir (RTC) udah berengkah dikena ba taun 2014, meri seri ngagai lebih 10,000 iku mensia, lalu klinik ngeli ba RTC Mid-Layar, Betong ke udah meri servis ngagai urung 7,900 iku orang.
“Diatu, kitai bisi 36 buah klinik ngeli perintah di Sarawak ti nyendiaka servis nyaga pengerai mulut ngagai mensia mayuh. Peratus klinik ngeli nyendiaka servis ngagai pesakit pulai hari nambah ari 19 peratus ba taun 2011 ngagai 100 peratus kenyau ari taun nyin kemari,” ku iya.
Ngagai sekeda kandang endur ke nadai klinik ngeli, program ‘ outreach’ deka chakah enggau suah agi dipejalaika, pia mega timpuh datai nemuai.
Kelimpah ari nya Abang Johari mega madahka servis nyaga pengerai ngeli Sarawak patut ulih ngerembus makit luar ari Sarawak nyema deka ngerembai baka servis nyaga pengerai enggau sektor pemakai.
Ambika banding ku iya, penyampau kitai di Sarawak 3 juta iku ke enda ulih makai mayuh tang 3 billion iku di serata menua Asia ulih makai lebih mayuh lalu nya mih makit kitai.
“Pia mega, 3 juta iku kitai semina bisi 6 juta set ngeli tang enti kitai ulih ngerembaika servis tu ngagai menua di luar Sarawak tentu lebih ari 6 juta set ngeli dijaga.
“Aku ngasaika enda patut kitai enda ulih nyapai nya enti servis ngeli kitai ulih nempa reputasyen dikena meri pengarap ngagai makit luar baka servis nyaga pengerai kitai,” ku iya.
Sama bisi datai, Direktor Opis Pengerai Nengeri Sarawak Dr. Jamilah Hashim; Presiden MDAEZ Dr Ng Woan Tyng enggau Chairman Pengatur Kongres nya Dr. Sim Wen Saan sereta ke bukai.