‘8th Borneo Dental Congress’ pelasar berandauka konsep baru dalam bidang perubat ngeli
KUCHING: Bisi 434 iku nyengkaum pakar ngeli, lutur ngeli enggau staf sukung perubat ngeli berandauka konsep enggau juluk baru dalam bidang perubat ngeli nengah ‘8th Borneo Dental Congress’, ke tembu diatur sehari tu.
Chairman Pengatur ‘8th Borneo Dental Congress and Trade Exhibition cum 9th MDAEZ AGM, Dr Sim Wen Sann madahka nya setipak enggau pemansang bidang tu ke jampat maju sereta agi mayuh inovasyen enggau invensyen ke benung ditempa dikena ngerapitka takah sains.’
Ku iya, pekara ke disangka kitai enda ulih nyadi dulu suba diatu udah nyadi belama tiap hari.
“Nya alai, rambai jaku kongres tu ‘Redefining Impossible’.
Ba kongres tu kami berandauka konsep enggau juluk baru dalam bidang perubat ngeli ti ngelui ari penemu ke bisi diatu sereta nguji ngena teknik nerangka baru pekara ti dikumbai enda ulih nyadi dalam bidang tu,” ku iya.
Dr. Sim mansutka penerang nya dalam jaku pengelalu pengerami bejadika 8th Borneo Dental Congress ke diatur Malaysian Dental Associaton Eastern Zone (MDAEZ) ba sebuah hotel ditu, kemari.
Kongres nya udah mujur dipenyadika Kepala Menteri Datuk Patinggi Abang Johari Tun Openg. Sama bisi datai Direktor Opis Pengerai Nengeri Sarawak Dr. Jamilah Hashim sereta Presiden MDAEZ Dr. Ng Woan Tyng.
Bejaku baru, iya madah taja pan menua majak maju tang batang prinsip profesyen enda patut ditinggalka laban isi dalam pekara ke dikemeranka iya nya deka ngangkatka peninggi tikas nyaga pesakit, ke pemadu beguna enda ngeruga tauka ngemedis pesakit.
“Nya kebuah taun tu keterubah iya mega kami ngatur licha enggau worksyop bekaul enggau ‘infection control and sterilization,” ku iya seraya madahka nya sebengkah ari juluk dikena ngetanka batang profesyen bidang perubat ngeli.
Speaker ke bisi dikanggau iya nya Dr. Jeerapahat Jantarat ari Thailand; Dr. RL Halili-Castillo (Filipina); Dr. Rumpa Wig (India); Dr. Matthew Wong enggau Dr. Wong Li Beng ari China enggau speaker ari Malaysia iya nya Dr. Tay Keng Kiong, Dr. Lani Daga, Dr. Shashitharan Sadacharan, Dr. Juaana Bahadun, Dr. Hiram Ting enggau Dr. Nariman Singmamae.