Perintah ngambi timpuh ke panjai nambahka penyampau pesereta STEM

SIBU: Perintah nengeri ngambi udah timpuh ke panjai nambahka penyampau nembiak nyereta bidang Sains, Teknologi, Injiniring enggau Matematik (STEM).

Mantaika pekara tu, Menteri Muda Pelajar enggau Pansik Teknologi Dr Annuar Rapaee mayuh pemansang pengelandik udah diperambu.

“Deka nyadi nengeri ke pemadu maju manggai ba taun 2030, Sarawak udah ngambi singkang ke lengkas dikena nambahka penyampau nembiak ti ngambi STEM, abis nadai 40 peratus.

“Ke diatu, penyampau nya semina 19 peratus,” ku iya lebuh bejadi Pemandang Pro-DR Siri 4 ke diatur ditu ensanus.

Dr Annuar, ke mega Menteri Muda Pengawa Berumah enggau Pengerai Mensia Mayuh bejadi program nya diarika D.O Sibu, Awang Yusup Mostapha.

Ku Dr Annuar, STEM nya beguna amat dikena ngemansangka ekonomi, ngemansangka inovasyen Sains sereta muka peluang kereja.

“Di USA, pelajar STEM nyadi kunchi ekonomi US jemah ila. Di Australia, ketegal raban graduet ti kurang landik dalam STEM, ngujungka penyampau nembiak ti nadai kereja di Australia nambah, pia ku ripot ari PwC,” ku iya.

Dr Annuar ke mega kaban komiti Kaunsil Tabung Ekonomi Gagasan Anak Bumiputera Sarawak (Tegas), madahka STEM ukai semina nyendiaka peluang kereja ungkup jemah ila, tang nyaup ngemujurka pemansang nengeri kelebih agi ba SCORE enggau ekonomi digital.

“Ba SCORE, kitai begunaka raban nembiak ti bisi pengelandik dalam bidang teknikal enggau vokasional. Dalam ekonomi digital, kitai begunaka nembiak ti bisi pengelandik ba teknologi tinggi enggau dagang digital sereta e-dagang.”

Nambahka nya, iya mega arapka perintah nengeri ulih nempa mayuh agi pekereja digital dikena ngemujurka agenda dikena ngemansangka Sarawak manggai ba taun 2030 nengah ekonomi digital.

Bisi 45 institusyen enggau ejensi nyereta pemandang nya.

Sama bisi datai Menijar Tegas Sabatini Jihob, Temenggong Stanley Geramong enggau Pemancha James Sembilan.